La fisica es una sciéncia apassionanta. Quand pensas que sas quicòm, de nòvas recèrcas càmbian la compreneson qu’aviam de cèrtas teorias. Una còla de fisicians angleses ven de descobrir un nòu mecanisme dins lo procès de creacion de fotons (parelhs). La descobèrta pòt limitar la compreneson actuala de la resolucion espaciala e de la pròpria teoria quantica.
Lo director de l’estudi, David Andrews, de l’Universitat d’East Anglia (Norwich, Anglatèrra), a confirmat que, pendent lo procès de creacion de parelhs de fotons, aquestes pòdon nàisser de desparièras localizacions. Aquò aurà una granda implicacion en fisica quantica, la basa teorica de la fisica modèrna.
Aquò pr’amor que fins a uèi lo jorn, se pensava que los parelhs de fotons naissián necessàriament dins un meteis luòc de l’espaci. Las repercussions son grandas pr’amor que la practica quantica es utilizada uèi en fòrça procèsses dins los laboratòris de la planeta (en criptografia quantica mas tanplan en teleportacion quantica).
La descobèrta, e mai siá un trabalh que li cal encara una confirmacion experimentala, es estada facha en tot estudiar la conversion parametrica espontanèa (SPDC en anglés). Dins aquel procès fisic, los scientifics fasián passar de particulas fotonicas a travèrs d’un cristal per generar de parelhs de fotons. Descobriguèron que los procèsses de creacion d’aqueles parelhs fotonics se fasián en desparièrs luòcs de l’espaci.
“A un nivèl fondamental – çò expliquèt Andrews– lo procès de conversion de fotons en parelhs arriba a travèrs de cèrtas interaccions qu’intrarián dins la susceptibilitat optica non lineara de segond òrdre. Es mai una responsa dipolara electrica de tresen òrdre”.
Combinacion d’energia fotonica
Aital, la còla qu’a fach la descobèrta a confirmat que cada parelh de fotons a una cèrta energia combinada a un moment del temps parièr al del foton exterminat. “Quand los nòus fotons son creats, compartisson l’energia del procès conegut coma conversion degenerativa (DDC en anglés) –çò diguèron los cercaires–. Ara, l’identificacion scientifica d’un nòu mecanisme delocalizat mòstra que cada parelh de fotons pòt èsser creat en desparièrs ponches de l’espaci e aquò balha una determinacion incèrta a las originas de la fisica quantica mai fondamentala”.
Los sistèmas de computacion –que tractan de grandas quantitats de donadas a una velocitat plan nauta– e d’autras zònas de la fisica quantica se poirián veire afectadas per la nòva descobèrta facha per aquela còla scientifica.” Los fotons an quitat d’èsser los còps de lutz qu’aviam imaginats fins a uèi”, çò soslinhèron. L’estudi es estat publicat dins la revista numerica Physical Review Letters.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
