Sus la plaja de Trachilos, en Creta, son estadas descobèrtas de pesadas polemicas. Son estadas descrichas dins la revista numerica scientifica Proceedings of the Geologists, mas balharàn a la comunautat scientifica una discussion de las grandas. Los cercaires que las an estudiadas dison qu’an mai de 5,6 milions d’ans e que foguèron fachas per d’ominins.
Mai ancianas encara son – encara oficialament– las pròvas que demòstran qu’Ardipithecus ramidus demorèt en Etiopia fa 4,4 milions d’ans. Es lo fossil d’un ominin mai ancian jamai trobat fins a uèi lo jorn. E totun, las pesadas trobadas ara en Creta encara son d’1,2 milion d’ans mai ancianas. Cossí es possible?
Un ancessor uman desconegut
Las pesadas trobadas ara mòstran un pè plan semblable al qu’avèm uèi. E los paleoantropològs qu’an descrich Ardipithecus an totjorn afirmat que foguèt l’ancessor dirècte mai ancian dels ominins que i aguèt en Africa puèi. Mas tanben confirman qu’un pè coma lo qu’avèm uèi encara s’èra pas desvolopat.
“Çò que fa venir plan polemica aquesta descobèrta son l’edat e lo luòc de las pesadas –çò diguèt un dels autors de l’estudi, Erik Ahlberg, de l’Universitat d’Uppsala–. Foguèron fachas a l’epòca que demoravan Sahelanthropus e Orrorin, çò es mai d’un milion d’ans abans Ardipithecus, qu’encara aviá un pè de monard”.
Per ansin, la nòva ipotesi es totalament contrària a la conclusion qu’Ardipithecus foguèt un ancessor dirècte dels ominins que venguèron puèi. E fins ara totes los fossils trobats d’ominins amb mai d’1,8 milion d’ans (l’edat d’Homo Georgicus) son totjorn estats trobats en Africa. Per tant la majoritat dels cercaires dison que nòstra espècia evolucionèt en Africa.
Malgrat aquò, las pesadas de Trachilos son estadas analisadas amb de foraminifèrs e tanben l’estudi dels depauses del luòc. E las ròcas sedimentàrias trobadas a lor torn an una edat de 5,6 milions d’ans. De mai, ongan meteis, una autra còla de cercaires confirmèt que los òsses d’un primat trobat en Grècia e Bulgaria èran los d’un ominin –pas d’un primat – que demorèt fa 7,2 milions d’ans. Es estat apelat Graecopithecus freybergi.
“A l’epòca lo desèrt del Sahara existissiá pas. I aviá un environament de savana del nòrd d’Africa estant fins a la Mediterranèa e mai luènh encara –çò diguèron los cercaires qu’an estudiat las pesadas de Trachilos–. Aital seriá pas malaisit de veire d’ancians ominins que viatjavan per l’Euròpa del Sud-Èst e Africa e que laissèron de rèstas de lor pas dins çò que puèi seriá Creta”.
Segon Ahlberg, aquela descobèrta càmbia al 100% l’istòria de l’evolucion umana coneguda fins ara. Cal dobrir doncas lo debat e estudiar amb mai de prigondor las pròvas pr’amor que benlèu los ominins del Miocèn de Creta balhan a nòstra espècia una nòva edat de naissença.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
