Los scientifics avisan que l’aiga de la planeta conten de mens en mens d’oxigèn. Pas solament dins la mar mas tanben dins de lacs, de flumes, de rius e l’aiga de la còsta e amb un ritme estonant. La vida aqüatica doncas es fòrça menaçada.
Segon los cercaires, aquel procès es plan restacat amb l’escalfament climatic. La pollucion, la pèrda de biodiversitat e l’acidificacion dels oceans. Tot aquò foguèt publicat dins un estudi del numeric scientific internacional Limnology and Oceanography.
Los cercaires qu’o dison apertenon a l’Institution Scripps d’Oceanografia de l’Universitat de Califòrnia (UC) a San Diego, e avertisson que i a de mens en mens d’oxigèn als oceans mas tanben dins los sistèmas d’aiga doça. E aquò situarà la planeta en un luòc malsegur car los cambiaments poirián pas èsser reversibles per l’umanitat.
Lo procès de desoxigenacion
Las donadas provenon de l’aiga dels oceans mas tanben de l’aiga de la còsta, dels flumes, rius e lacs. Lo procès es global, doncas. E ara los scientifics vòlon descobrir quin es lo limit per la planeta. L’estudi comencèt en 2009. Se voliá saber lo gra de resisténcia de la Tèrra. E per aiçò tanben s’estudièt l’activitat umana. Lo limit de la planeta es lo cambiament climatic, l’acidificacion oceanica, la pèrda de biodiversitat, la pollucion atmosferica, la diminucion de l’ozòn, los cambiaments dins l’aiga doça mas tanben dins lo sòl, la contaminacion quimica e lo cicle de l’azòt actual.
«La santat de la planeta depend de l’establitat de l’ecosistèma aqüatic car a de besonh d’oxigèn per poder foncionar corrèctament, çò diguèt Erica Ferrer, cercaire de l’UC a Santa Barbara. L’estudi foguèt realizat per veire s’aver mens d’oxigèn èra una menaça globala e o avèm pogut demostrar».
Per ansin, la diminucion de l’oxigèn poiriá cambiar los procèsses biologics e quimics que regulan lo clima sus la planeta. Lo declin tanben menaça tot lo ret trofic, las làmias e lo peissum e mai la vida microscopica. La menaça es tan nauta que los cercaires demandèron d’ajuda a las Nacions Unidas: s’agís de jónher lo problèma amb las autras problematicas environamentalas.
«Saber que la desoxigenacion aqüatica es fòrça grèva pòt ajudar a comprene cossí se pòt far patir la planeta, çò apondèt Ferrer. O saber pas es critic per la biodiversitat e pel clima de la Tèrra”.
La redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Imatge principau: Chris.L.Dodds/CC
