DE CROCODILS ERBIVÒRS
Quand pensam a de crocodils, totes pensam aisidament a de grands reptils carnivòrs. Mas ara semblariá que lor anciana dièta foguèt, fins a tres còps pendent de tempses ancians, omnivòra e mai erbivòra. Pas totas las espècias de crocodils mas sonque cèrtas espècias ancianas. Es çò que rapòrta la revista numerica scientifica Current Biology.
“Çò de mai interessant dins çò qu’avèm descobèrt, çò diguèt Keegan Melstrom, cap d’aquel estudi fach per l’Universitat d’Utah, es trapar que plusors espècias escantidas de crocodils mangèron de plantas. E aquò se tenguèt fins a tres còps aumens, benlèu sièis, pendent de tempses arcaics”.
Per ansin, una de las caracteristicas principalas de totas las espècias de crocodils e alligators actuals son lors dents simplas e conicas, restacadas a una dièta carnivòra. Mas un nòu estudi realizat per de cercaires d’aquela universitat estatsunidenca confirmèt que d’ancianas espècias de crocodils avián agut divèrsas diètas segon la region.
Aital, e malgrat que totas las espècias de crocodils actuals sián carnivòras, de formas ancianas de crocodils aguèron, a ne jutjar per lors dents, de diètas non carnivòras. La còla de cercaires estudièt fins a 146 dents de 16 espècias diferentas de cocodrils escantits, e descobriguèron que mai d’una foguèron omnivòras e plusors autras vegetarianas.
En cèrca de la dieta originària
Los cercaires d’aquel estudi comencèron d’analisar la dièta d’aquelas espècias de crocodils mòrtas uèi e confirmèron que la varietat dentària èra granda e tanben lor dièta. Aquò aguèt benlèu luòc après l’aparicion dels crocodils dins l’istòria naturala de la planeta, un fach que se passèt justament après lo grand escantiment de la fin del Triassic que contunhèt fins la fin del Cretacèu e qu’auciguèt totes los dinosaures mas pas los aucèls e divèrsas espècias de crocodils. Fins a tres còps dempuèi alara, e bensai fins a 6 còps, aqueles reptils tenguèron una dièta vegetariana.
“Las formas ancianas de crocodils aguèron una varietat estonanta de diètas, çò apondèt Melstrom. Qualques unas èran carnivòras coma uèi lo jorn, d’autras omnivòras e d’autras encara totalament erbovòras. E aquestas demorèron sus mai d’un continent”. Un fach qu’es tras qu’estonant, tanben o cal dire.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
