Una còla internacionala de cercaires poguèt, fin finala, deschifrar lo còdi genetic de la populacion europèa neandertaliana dels darrièrs 80.000 ans. Per ansin, estudièron dos individús d’aquela espècia que demorèron al nòstre continent fa pus de 120.000 annadas. La resulta foguèt qu’èran mai semblants a de neandertalians pus tardièrs europèus que non a de neandertalians contemporanèus siberians. Aquò vòl dire que i aguèt una continuïtat genetica neandertaliana en l’Euròpa pus occidentala e qu’aquela populacion auriá migrat fins Siberia en de tempses mai recents.
L’estudi genatic confirmèt que totes los neandertalians europèus aurián coma ancessors un solet grop de la meteissa espècia e qu’auriá un aujòl comun que demorèt en Euròpa fa 97.000 ans. Mas un neandertalian de la Cauna de Denisova en Siberia de fa 90.000 ans seriá mai pròche a aqueles ancians neandertalians qu’un autre neandertalian trapat en Altai e que demorèt fa 120.000 annadas. E aquò es símbol d’una migracion neandertaliana vèrs Siberia.
La còla de cercaires, dirigida per Stéphane Peyrègne, de l’Institut Max Planck d’Antropologia Evolucionaria e lors collègas aurián analizat l’ADN de dos individús neandertalians que lors rèstas foguèron trapadas en la cauna alemanda d’Hohlenstein e la bèlga d’Scladina.
Una populacion tipica europèa
Aquela populacion neandertaliana seriá demorada en Euròpa occidentala fa 120.000 annadas e n’i auriá una autra en Siberia. Los primièrs migrèron en çò dels darrièrs. Totun, que cal encara trapar los ancessors d’aquelas populacions. “Los mai ancians neandertalians europèus, çò diguèt Kay Prüfer, de l’Institut Max Planck, aurián eireitat l’ADN d’una populacion pus anciana encara pas trapada. Poiriá èsser una populacion europèa isolada o una populacion mai granda africana restacada amb d’umans modèrns. L’estudi foguèt publicat al numeric scientific Science Advances.
La Redaccion
