Qu’ei un nau dispositiu que profita eth contrast entre era lutz e era escuror entà produsir un corrent d’electricitat que servís entà hèr foncionar ua petita maquina. Aguesta naua operacion fisica permeterà un dia produsir electricitat en airaus damb solament ombra; e se i a mès ombra se produsís encara mès energia.
Eth nau dispositiu ja pòt hèr foncionar petites maquines electriques en tot profitar eth contrast que i a entre es airaus en ombra que son prèp d’auti damb fòrça lutz. Segontes un des scientifics qu’i trabalhèren, Swee Ching, dera Universitat de Singapur “des d’ara podem crear energia en toti es lòcs dera planeta, tanben en espaci”.
Atau, Tan e d’auti collègues poderen crear un generador d’electricitat que fonciona parièr en lòcs damb ombra. Aueren succès pr’amor que cambièren era tampa deth madeish damb ua auta hèta d’aur sus silici, un materiau utilizat normauments entà auer electricitat de cellules solars. E com se siguesse ua cellula solar eth silici produsís energia a trauèrs de sòns electrons damb era lutz. Damb er aur, a mès, eth dispositiu tanben produsís energia quan i a ombra.
Ua dança d’electrons
Çò que se debana ei qu’es electrons comencen a dançar damb excitacion e sauten der aur enquiar silici. Quan ua part deth dispositiu ei en ombra encara se produsís mès e mès electricitat. Aguesta electricitat pòt èster profitada entà auer electricitat en un circuit extèrn e pòt tanben èster utilizat entà hèr foncionar ua petita maquina electrica. Eth descorbiment siguec publicat ena revista scientifica de prestigi online Energy & Environmental Science.
Dempús, e damb solament ueit generadors, era còla scientifica que hège aguest experiment poguec hèr foncionar ben un relòtge electric. Eth dispositiu tanben pòt èster profitat com un sensor. Atau, un petit coche electric hec ombra sus un generador e poderen crear electricitat entara produccion de lutz entà ua LED.
Quan mès contrast i auie entre era lutz e era escuror mès energia podien produsir. Ara, aquera còla de cercaires trabalha en diferentes estrategies entà auer mès e mès lutz e atau poirien tanben crear mès electricitat damb mès ombra, un hèt susprenent.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
