Los Estats Units creèron la setmana passada (lo jorn de creacion foguèt lo 20 de decembre) un nòu còrs militar dins l’armada estatsunidenca: la Fòrça Espaciala dels Estats Units (US Space Force). Es lo primièr novèl servici dins l’armada estatsunidenca dempuèi la creacion de la fòrça aeriana (US Air Force) en 1947 e la primièra fòrça d’aquel tipe sus tota la planeta. Mai de 16 000 soldats i foguèron afectats e sa tòca seriá de defendre los interèsses d’aquel país e de sos aliats dins l’espaci.
Lo cap que dirigirà aqueste nòu servici militar serà lo Secretari General de la Fòrça Aeriana mas lo cap d’operacions es, uèi lo jorn, lo general John W. Raymond. Demest las foncions del nòu servici de la FEEU (Fòrça Espaciala dels Estats Units o USSF en anglés), cal soslinhar l’exercici de divèrsas operacions dins l’espaci en mai de protegir los interèsses nacionals dels Estats Units amb l’usatge de la fòrça armada e d’arrestar d’atacas qu’aurián per origina l’espaci exterior a la planeta.
Segon lo decret de creacion d’aquela nòva fòrça espaciala, totes los membres del Comandament Espacial de la Fòrça Aeriana dels Estats Units (e actualament fins a 16 000 membres de la Marina e de l’Armada de Tèrra) dintraràn dins un periòde de 18 meses dins la FEEU per poder trabalhar melhor dins l’espaci e de manièra independenta.
Una promessa presidenciala
La creacion d’una armada espaciala dels Estats Units foguèt una promessa electorala que la faguèt lo nòu president d’aquel país, Donald Trump, en març de 2018 per ganhar las eleccions legislativas estatsunidencas. Pauc puèi, en junh de 2018, demandèt al Departament de Defensa de son país cossí crear un servici espacial independent e s’aquò èra possible.
Après la responsa positiva del Conselh Espacial dels Estats Units en febrièr d’ongan foguèt signat lo decret de sa creacion, que sonque seriá valid a partir del moment considerat mai oportun pel president estatsunidenc. E aqueste foguèt lo 20 de desembre passat, quand se debanèt una ceremònia dins la basa militara Andrews ont la FEEU foguèt presentada coma lo seisen còrs de las fòrças armadas estatsunidencas, e la primièra fòrça espaciala de tota la planeta. Cossí que siá, es la resulta dels nòus tempses que fan pensar que pòdon èsser totalament desparièrs de çò qu’avèm viscut fins a uèi lo jorn. Lo temps o nos dirà.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
