Es çò qu’una còla de psicològs a volgut comprene. E après far divèrses estudis creson saber qualas serián las tecnicas que permeton d’aver un sòmi lucid. Lo sòmi clar (lucid dreaming en anglés) es un biais de somiar que la persona i es conscienta mentre que sòmia e aital pòt contrarotlar l’experiéncia. Mas per trobar cossí poder o far son estats realizats abans plusors assages sus prèp de 200 volontaris.
E cossí i arribar es estat descrich coma una amassada de tecnicas desparièras que son estadas publicadas dins la revista numerica Dreaming per una còla de psicològs de l’Universitat d’Adelaïda (Austràlia). Mai de 169 volontaris son estats estudiats après èsser devesits en 3 grops. Solament aital s’es pogut confirmar cossí arribar d’aver de sòmis lucids.
Un dels tres grops, totun, passèt las espròvas dels tres grops e li apliquèron las tres tecnicas diferentas. Èran 47 volontaris e un 17% d’eles arribèron al sòmi lucid pendent un periòde d’una setmana. Aquela chifra èra una escasuda a respècte dels autres dos, qu’al cap d’una setmana avián pas pogut pervenir a contrarotlar lors sòmis.
Una amassada de tecnicas
La combinason de las tecnicas, apelada MILD en anglés, foguèt, malgrat aquò, una vertadièra reüssida que permetèt als psicològs de saber cossí arribar fin finala de contrarotlar conscientament los sòmis. Amb la tecnica MILD, los volontaris que pervenguèron a aver de sòmis lucids foguèron fins a un 46%.
“Es una tecnica psicològica nòva que trabalha prigondament çò que nosautres apelam “la memòria prospectiva” –çò diguèt Denholm Aspy, cap de l’estudi–. Aquò es l’aptitud umana de se ramentar cossí far de causas dins l’avenidor”.
En tot repetir, amb una frasa que nos podèm remembrar, que sèm dins un sòmi se balha la ment l’escasença de se remembrar que sèm dins un sòmi –çò apondèt Aspy–. Aquò es lo primièr pas per arribar al sòmi lucid”.
En mai d’aquò, çò de mai important dins las resultas del grop de psicològs australians es que las personas qu’avián aplicat aquela tecnica patissián pas puèi cap de privacion de sòm l’endeman, çò que vòl dire que la tecnica MILD a pas d’efièches negatius sul sòm.
“Son de tecnicas que fan avançar d’un pas dins lo desvolopament de l’induccion del sòmi lucid pels umans –çò contunhèt Aspy–. Aquò permetrà de senhorejar las cachavièlhas e d’aver mai d’aptituds fisicas e piscologicas dins la recèrca sul sòmi clar e son environament”.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
