La planta, qu’a recebut lo nom d’Spiranthes hachijoensis, se trapa, mai que mai, dins los districtes japoneses de Kyushu, Shikoku, Chubu e Kanto. Fa partida del grop Spiranthes, un genre d’orquidèas de la sosfamilha dels orquidoidèus. Uèi lo jorn, son mai de 50 espècias que demòran en de regions tropicalas e suaus d’America, Asia e Austràlia. Mas la siá descobèrta confirma que la sciéncia pòt pas jamai arrestar lo sieu trabalh a l’ora d’explorar mai e mai encara, malgrat que se pensa que demòra pas pus gaire per descobrir.
Pels cercaires qu’an confirmat la siá existéncia la tròba foguèt estonanta. Tanben foguèt plan malaisit de li poder balhar un nòu nòm e causiguèron Spiranthes pr’amor de las siás morfologia, plasticitat e caracteristicas. La caliá inclure dins lo grop Spiranthes mas Spiranthes sinensis ja existissiá e aviá tanben una plan màger distribucion mondiala. La siá classificacion foguèt doncas dificila.
“Lo genre Spiranthes inclutz un grop plan espandit d’orquidèas qu’an tanben de caracteristicas plan desparièras, çò diguèt Kenji Suetsugu, de l’Universitat de Kobe. Las flors d’aquestas son pichonèlas e blancas e amb la forma d’una espirala”. Fins ara, se pensava qu’Spiranthes en Japon èra formada sonque per una unica espècia: Spirantes australis. Pasmens, de nòus estudis de divèrses especimens d’Spirantes japonesas an demostrat que i aviá mai d’una espècia.
Una espècia isolada
Aital, la nòva espècia d’orquidèa recebèt lo nom d’Spiranthes hachijoensis per la diferenciar de l’autra, car Spiranthes australis florís un mes abans. Totas doas espècias son isoladas geneticament per aquela caracteristica. La nòva orquidoidèa fa entre 8 e 25 cm de long e pòt arribar als 5 mm de diamètre.
“Calguèt un estudi plan prigond pendent mai de dètz annadas per poder trapar de biais scientific se las doas plantas èran la meteissa espècia o doas distintas e quinas caracteristicas morfologicas e biologicas avián”, çò apondèt Suetsugu. Los especimens estudiats foguèron trapats en Japon mas tanben en Taiwan e Laos.
Per ansin, una analisi genetica de l’ADN de la planta combinada a un estudi biologic sul terren a menat a considerar que la nòva espècia podiá téner un gra de divergéncia moleculara fòrça elevat, malgrat que la diferéncia morfologica foguèsse pas tan nauta. E doncas Spiranthes hachijoensis pòt èsser uèi trobada dins los districtes japoneses de Kyushu, Shikoku, Chubu e Kanto mas es plan mai rara qu’Spiranthes australis. “Una populacion normala a sonque aperaquí 20 especimens, e la populacion pus granda de totas èra formada per sonque 100 individús, çò confirmèt Suetsugu. La siá classificacion coma nòva espècia de planta demòra dins lo grop d’espècias vulnerablas pr’amor que pensam que n’i poiriá aver aperaquí sonque 1000 individús sus tota la planeta”. L’estudi es publicat dins lo numeric Journal of Plant Research.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
