Home DIVÈRSES CÒSTA RICA VÒ ENEBIR ETH PLASTIC
CÒSTA RICA VÒ ENEBIR ETH PLASTIC
0

CÒSTA RICA VÒ ENEBIR ETH PLASTIC

0

Era naua lei serà includida laguens d’ua estratègia nacionau de Còsta Rica entà proïbir eth plastic en 2021. Damb aguesta lei aqueth país d’America Centrau vò dar exemple a toti es païsi dera planeta e èster eth prumèr estat deth Mon que situarà eth plastic dehòra dera lei.

Damb aguesta lei Còsta Rica vò èster eth prumèr estat deth Mon que situarà eth plastic dehòra dera lei.

Peth moment ei ua prepausa deth ministre dera Santat, Desvolopament e Energia de Còsta Rica, qu’a ja eth supòrt deth Programa de Desvolopament de Nacions Unides, diuèrsi govèrns locaus d’aqueth país e tanben diuèrsi grops privadi dera societat. Er anonci dera proïbicion deth plastic en tres annades siguec hèt aguest madeish mes, pendent eth Dia der Environament Mondiau.

“Èster un país liure de plastic ei era nòsta tòca e era nòsta mission – çò diguec eth ministre costarican der Environament Edgar Gutierrez -. Sabem qu’açò non serà facil e qu’eth govèrn dera nacion a de besonh fòrça ajuda entà poder ac hèr. Nosati solets non ac podem hèr”.

Ath delà, eth ministre confirmèc que ara cau promòir diuèrsi cambis ena mentalitat des abitants deth país centreamerican. Cau dar fòrça informacion a toti es sectors dera societat, es publics mès tanben es privadi, e realizar accions entà poder cambiar era utilizacion de plastic a trauèrs de cinc accions estrategiques: incentius municipaus, politiques d’ajuda, cambi des productes de plastic, recèrca scientifica e inversions variades.

Ua peticion fòrça peculiar

Pendent er anonci d’aguesta nòva lei, eth govèrn de Còsta Rica volguec hèr ua peticion fòrça particular. Atau, demandèc eth lideratge e era participacion concrèta des hemnes de Còsta Rica entà poder hèr ben eth cambi. Era arrason ei qu’aqueres son un des actors mès potenti dera societat deth país centreamerican.

Enquia aué Còsta Rica ja ei considerada coma un des païsi capdaus ena luta contra eth cambi environamentau dera planeta.

Enquia aué Còsta Rica ja ei considerada coma un des païsi capdaus ena luta contra eth cambi environamentau dera planeta pr’amor des sues politiques d’energia 100% renovables. A mès, Còsta Rica tanben vò èster un país liure de carbon en 2021, un objectiu que ja plantegèc hè 10 annades. Per tot açò es Nacions Unides volgueren felicitar eth país centreamerican.

“Maugrat que Còsta Rica ei un exemple entà tota era planeta peth sòn cambi ena deforestacion (en 1984 solament auie 26 % de bòsqui e en 2018 ja n’a 52%) un cincau des 4000 tònes de lordères diàries acaben en paisatge deth país e contaminen atau es arrius e es plages – çò digueren hònts governamentaus– e pr’açò cau proïbir dejà eth plastic”.

A mès, eth govèrn de Còsta Rica volguec descríuer eth problèma deth plastic coma un problèma globau. En 2050 ja i aurà mès plastic en es oceans que non peishi. E pr’açò Còsta Rica vò iniciar aguesta luta. Es beneficis seràn entà toti: era gent de Còsta Rica mès tanben era dera planeta. Un polit exemple a seguir.

Era Redaccion

Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.

LEAVE YOUR COMMENT

L'adreça electrònica no es publicarà. Els camps necessaris estan marcats amb *