Es arribada una denóncia publica òrra. De totes es sauput que la caça e la pesca d’animals e peisses sus tèrra mas tanben en mar de manièra illegala es un problèma mondial. Mas lo chaple cèc d’espècias de mamifèrs per los utilizar puèi coma esca dins de luòcs de pesca es un fach desconegut. Es una activitat que cal denonciar pr’amor que tot lo Mond o a de saber per l’arrestar.
Es una practica abituala mas inconeguda. La lista de mamifèrs e d’autres animals aucits per èsser utilizats coma noiridura de pesca es fòrça comuna dins de luòcs coma l’America del Sud mas tanben en Asia. Las nòvas donadas rendudas publicas vòlon avisar d’aqueste òrre fach per assajar de l’arrestar.
Aital, a l’ora d’ara, de milièrs de mamifèrs aqüatics coma de dalfins, de leons de mar, de fòcas o de loiras son tuats cada an per atraire los peisses dins de luòcs de pesca dins divèrsas regions de la planeta. Seriá, segon de nòus estudis, un fach plan mai comun que se pòt pensar. A mai, los scientifics qu’o an volgut rendre public an volgut cridar l’atencion sus las comunautats scientifica e ecologica mondiala pr’amor qu’es un problèma pauc conegut.
Pesca illegala de milièrs d’animals
Serián de milièrs e milièrs d’animals coma los dalfins, las tartugas de mar, los aucèls e d’autras espècias que serián capturadas de manièra illegala o accidentala pendent la pesca d’autras espècias. Lo problèma real arribariá puèi, quand aqueles animals serián tuats e venduts coma noiridura per peisses. Segon los cercaires qu’an volgut alertar sus aquò, i aurián 40 espècias de mamifèrs aqüaticas caçadas e pescadas de biais illegal dempuèi l’an 1970 en 33 païses. Los dalfins, per exemple, serián pescats e donats coma aliments dins de luòcs de pesca de làmias.
Una de las scientificas qu’a amassat aquelas donadas, Vanessa J. Mintzer , de l’Universitat de Florida, soslinhèt qu’aviá agut fòrça problèmas per las amassar pr’amor que i a un cert secretisme dins aquel afar.
“Los botos, o dalfins d’Amazonas, son caçats sistematicament per que se venda lor carn coma esca per de peisses – çò confirmèt. Cal far mai d’estudis e mai prigonds amb mai de donadas per poder veire lo gra del problèma e quinas solucions i pòt aver”.
Segon Mintzer, de tuar d’animals marins es una activitat clandestina e atal se pòt pas plan conéisser l’impacte real sus cada espècia. Mas lo problèma poiriá arribar d’aver de nivèls totalament insostenibles e causar lo declin de cèrtas espècias de mamifèrs marins.
L’estudi es estat publicat dins la revista numerica Frontiers in Marine Science fa gaire e pendant lo Jorn Mondial dels Oceans. Amb aquò los cercaires marins coma Mintzer vòlon donar l’alèrta sus un problèma vertadièrament òrre.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
