Lo cambiament climatic que patís tota la planeta a l’ora d’ara poiriá entraïnar tanben de cambiaments prigonds al Mediterranèu. D’efièch, e segon las darrièras donadas scientificas, la temperatura d’aquesta mar creis mai d’un 20% pus que la mejana d’autres mars e oceans. A mai, la granda pression umana tanplan poiriá provocar de grèus cambiaments sus la fauna e flora mediterranèas pr’amor d’un excés de pesca, contaminacion, comèrci maritim e antropizacion de la còsta. Aital o afirma lo darrièr rapòrt de l’organizacion WWF, fach public pr’amor del Jorn dels Oceans d’ongan.
Per ansin, e segon aquel nòu rapòrt, lo Mediterranèu es a mand de venir una mar mai e mai tropicala pr’amor de l’arribada de nòvas espècias. Mai de 1 000 ne serián ja arribadas a la Mediterranèa pr’amor de la siá temperatura pus nauta pendent los darrièrs ans. Lo problèma es qu’aquelas espècias pas localas son un vertadièr dangièr per las espècias localas car ne son concurréncia e pòdon provocar la siá extincion. D’espècias coma los molluscs demeniguèron mai d’un 90% e en de luòcs coma Turquia o encara Chipre lo 90% de las pesca son ja de peisses leon o de peisses coma lo sigan, brica tipics d’aquesta mar.
Lo fonz de la mar tanben patís de cambiaments prigonds car los prats de Posidonia oceanica a mai dels coralhs e de nacras aurián ja patit una granda reduccion pertot. Aquò poriá entraïnar un impacte grèu sus tot l’ecosistèma marin mediterranèu car son la fònt basica coma ostal e noiridura de fòrça d’autras espècias marinas. Posidonia oceanica, per exemple, es aquela planta qu’arrèsta la creissença del CO2 en mai d’un 42% dins totes los païses mediterranèus.
Espetament de medusas
D’un autre costat, uèi lo jorn la Mediterranèa tanben patís un estonant espetament de medusas pr’amor d’una temperatura pus cauda de l’aiga, la contaminacion e la pèrda de predators. E aquò tanben aurà d’efièches dirèctes sul torisme o la pesca umana. Es pr’aquò que WWF demadnèt als govèrns mediterranèus d’ajudar la biodiversitat amb mai d’argent e o tornarà a far pendent la Convencion de Barcelona que se debanarà en Barcelona pendent la fin d’ongan.
La Redaccion
