Lo darrièr estudi fach per l’IPPC (Panèl Intergovernamental pel Cambiament Climatic) confirmèt d’un biais scientific que la temperatura de la Tèrra montarà aumens 1,5 gras abans dels proplèus 20 ans. E aquò pr’amor que totes los cambiaments climatics que las amassadas governamentalas internacionalas declarèron que caliá far pendent los darrièrs 20 ans aguèron coma resultat zèro. Çò es, res foguèt fach a nivèl politic, e pr’açò la temperatura montarà. Se pòt pas res far per aquò arrestar. Sonque podèm luchar, dempuèi ara, contra una temperatura encara màger las seguentas decadas.
Per ansin, e segon aqueste nòu repòrt de l’IPPC, l’umanitat dintrèt ja dins la zòna dangierosa pr’amor dels cambiaments climatics radicals que la planeta patirà los proplèus 20 ans. Lo camin que causiguèt l’òme per luchar contra lo cambiament climatic, segon los cercaires de l’IPPC, es plan marrit e aquò menarà ja a una direccion clara e cèrta: un cambiament environamental grèu que provocarà lo patiment e la mòrt de milions d’èsser umans. E aquò que ja fa mai de 20 ans que los scientifics demandan de reagir politicament.
Segon aqueste estudi la planeta venguèt mai cauda dempuèi l’an 1850 e ongan òm poguèt demostrar cossí aqueste cambiament climatic es cèrt: de fuòcs gigants en Estats Units e Grècia e d’inondacions al nòrd europèu e China. A mai, l’ondada de calor de l’estiu de 2021 tanben foguèt recòrd. “Lo problèma del cambiament climatic, çò apondèron los cercaires, es pas un problèma futur mas actual e cal lo resòlvre ara”.
4,4 gras mai de temperatura
L’scenàri pièger poiriá èsser una creissença de mai de 4,4 gras de temperatura abans de l’an 2100. I a quatre scenaris mai mas totes confirman que la montada de temperatura pendent las venentas decadas serà aumens d’1,5 gras. E pr’açò la promessa de l’Acòrd de París de 2015 es inutila.
Amb un nivèl zero d’emissions de CO2 ara, en 2021 (un fach impossible), la temperatura en l’an 2100 poiriá tornar a basar fins a sonque 1,4 gras mai qu’uèi lo jorn. Mas cal contunhar la lucha, çò diguèron los scientifics de l’IPPC, car mai e mai temperatura entraïna una pièger situacion climatica mondiala. E la lucha alavetz serà gigantassa e plan mai malaisida.
Amb mai calor, que pòt arrivar a èsser extrèm, i aurà tanben fòrça mai pluèja, e mens nèu; d’efièch òm pensa qu’en 2050 los pòls auràn pas pus de glaç pendent l’estiu. Aqueste repòrt, a mai, soslinhèt plan qu’arribaràn mai catastròfas umanas e socialas pr’amor del clima e qu’arribarà un jorn que totes aqueles problèmas poiràn pas pus èsser solucionats ) lo nivèl de la mar pòt créisser mai d’1,88 mètres ja abans de 2100.
En mai d’aquò, l’acidificacion de la mar demorarà sègles o milièrs d’ans e aquò es independent de mens emissions de CO2 actualas. L’umanitat provòca mai de 40 bilions de tonas de CO2 lançadas a l’atmosfèra d’un biais annadièr. D’emissions d’aperaquí 5 bilions annadièras en 2050 poirián ajudar a melhorar lo clima pendent lo sègle venent, pas abans. Mas totes los rapòrts parlan de mai del doble d’emissions de CO2 en 2050.
Pr’amor d’aquò plusors cercaires demandèron luchar ja contra lo cambiament climatic en tot confirmar que i aurà una creissença de la temperatura minimala d’entre 2,7 e 3,6 gras abans de la fin de sègle. Aquel scenari seriá mai realista segon los scientifics, e ajudariá mai los 200 estats que s’amassaràn al COP26 a Glasgow en novembre d’ongan a l’ora de confirmar donadas, car sonque la tòca de zèro per cent d’emissions provocarà un retorn a de temperaturas mai suaus pendent lo sègle XXII, mas pas abans, car ja es tròp tard.
La Redaccion
