Èra un fach que benlèu totes començavam ja a sospechar ongan pr’amor que, freg, çò qu’es dire freg, aqueste ivèrn n’i a gaire. E ara la prevision sasonala per l’ivèrn realizat pel servici meteorologic francés France Meteo ven d’o confirmar. Serà un ivèrn fòrça mai suau que la mejana dels darrièrs ans. Mas cal tanben èsser alerta car i aurà tanben fòrça vent e pluèja.
Per ansin, e coma se foguèsse una pròva scientifica mai del cambiament climatic actual, lo servici meteorologic estatal francés confirmèt que l’ivèrn qu’arriba ara patirà una dominacion oceanica, çò que vòl dire que serà un ivèrn suau e al còp umid al nòrd europèu e fòrça mai sec al sud, en païses coma Occitània o Catalonha. E l’escassença qu’aquò siá real pòt arribar a l’ora d’ara al 60%. 
Una prevision scientifica
Es una prevision meteorologica basada en de donadas scientificas: l’anticiclon de las illas Açòres es fòrça mai naut que la mejana dels darrièrs ans. Al còp, la depression d’Islàndia es fòrça mai prigonda que la mejana dels darrièrs tempses. La diferéncia entre la pression e la temperatura d’aqueles dos sistèmas climatics es çò que crea l’auratge d’ivèrn. E doncas l’ivèrn serà suau mas i aurà tanben de vent e de tempèstas.
Las previsions climaticas fachas uèi lo jorn an mai condicionants e aital, la relacion termica entre l’ocean, l’atmosfèra e lo continent europèu es una variabla plan importanta qu’abans se coneissiá pas mas qu’es fòrça estudiada uèi lo jorn. Per ansin, de païses coma Occitània, los Païses Catalans e Itàlia gausiràn d’un ivèrn fòrça mai suau. Un fach que serà patit pels esquiaires mas benlèu aimat pels qu’aiman pus lo freg.
La Redaccion
