Nòstra espècia nasquèt fa 300 000 ans en Africa. Puèi conquistèt aquel continent, ont tanben demorava Homo erectus. Puèi se comencèt d’espandir en defòra d’Africa per Asia entre fa 60.000 e 50.000 ans. Pasmens, sembla que quand arribèt dins la peninsula aràbia i demorèt gaireben 30 000 ans abans de tornar anar conquistar d’autres continents.
Es la resulta d’un nòu trabalh scientific publicat dins lo numeric PNAS. Homo sapiens sapiens seriá sortit d’Africa e se seriá arrestat almens 30 000 ans dins la peninsula aràbia abans de contunhar la conquista de la planeta. Pr’amor que los primièrs colonizaires modèrnes serián arribats ailà benlèu fa 100 000 ans e aurián trespassat aquel territòri, fins en Índia, vèrs 70.000 abans l’epòca actuala. E en Euròpa fa 55.000 ans. Puèi seriá vengut la conquista de Siberia (fa 25.000 ans) e d’America ( fa 15.000 ans).
S’adaptar melhor al clima
L’arrèst de 30.000 ans quelo faguèt nòstra espècia en tèrras aràbias l’auriá ajudada a s’adaptar a de nòvas condicions climaticas e aital poguèron subreviure al freg. Son de cambiaments genetics que uèi son restacats amb de malautiás coma l’obesitat, lo diabète o los problèmas cardiovasculars.
L’environament a totjorn cambiat geneticament l’espècia nòstra. Avèm la facultat de nos adaptar a totes los climas vertadièrament estonanta. E que benlèu d’autras espècias umanas aguèron pas. Sonque aital avèm ganhat la planeta e vencut la concurrència ominina. E qualques unes d’aqueles cambiaments genetics arribèron per la mescla amb aquelas autras espècias.
Los cercaires confirman que fa 60.000 ans i aguèt una fasa d’adaptacion estonanta de nòstra espècia. Una fasa que durèt 30 000 ans. Es estat confirmat geneticament e tanben arqueologicament e climaticament. Nòstres ancessors s’arrestèron dins lo nòrd arabi per s’adaptar a un clima pus freg.
Puèi, amb una melhora capacitat de produire mai de gras corporal, mai de nèrvis, una pèl pus resistenta e mai de fibras pichonas dins los òrgans per alenar avèm pogut contunhar lo camin. Pas abans. Lo clima de la peninsula aràbia entre fa 80.000 e 50.000 ans èra plan mai fred que l’actual.
Aquelas adaptacion, pasmens, uèi, provòcan de malautiás. En causa del cambiament genetic d’alavetz. Mai desvolopadas segon la populacion e lo continent. Pr’amor que l’arrèst de 30.000 ans cambièt per totjorn nòstra espècia e la resulta, al nivèl genetic, pòt encara èsser trobada e analisada pels cercaires uèi lo jorn.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
