TORNARMAI CAP A LA LUNA
Una nòva nacion decidiguèt de tornar explorar l’espaci en tot enviar una autra nau espaciala a la Luna: Índia. Per ansin, aqueste dimars, 22 de julhet, la nacion asiatica mandèt lo vaissèl espacial Chandrayaan 2 sus la Luna après quitar la basa espaciala indiana de Satish Dhawan, dins lo nòrd-oèst d’Índia, a 05h13.
La mission de Chadrayaan 2 serà de plaçar una pichona sonda terrèstra nomenada Vikran en mai d’un pichon tot-terren sonat Pragyan (Sapiéncia en sanscrit) sus la luna. S’aquò se debana plan en setembre, Índia serà lo quatren país terrèstre a poder mandar amb succès una nau espaciala sus la Luna après los Estats Units, l’Union Sovietica e China.
La fusada auriá pogut començar son viatge espacial en mai passat mas tot deguèt esperar après que se foguèt conegut que los israelians volián far çò de meteis (lor sonda espaciala s’espotiguèt sus la Luna). Puèi, lo 14 de julhet, de problèmas tecnics empachèron Chandrayaan 2 de partir de la Tèrra.
La sonda e lo tot-terren poirián aténher la Luna lo 7 de setembre d’ongan. Après aterrar sus la Luna, Pragyan se dessepararà de la sonda e començarà un camin de 500 mètres sul satellit natural de la Tèrra. Lo tot-terren ten dos espectromètres per mesurar la composicion del sòl lunar. Aquela operacion durarà sonque 14 jorns (un jorn solar) e finirà quand l’energia serà agotada (aperaquí un jorn lunar), pendent la nuèch lunara. Totun, la fusada contunharà d’estudiar lo satellit pendent una annada.
Près del pòl sud lunar
La tòca dels indians es de pausar Pragyan près dels 70 º de latitud sud lunara, mai luènh encara que lo luòc ont èra arribada la sonda espaciala chinesa Chang’e-4, çò es los 45.5º de la latitud sud lunara. L’interès pel pòl sud lunar ven del fach que s’i poguèt espepissar fa gaire per la fusada Chandrayaan 1 de moleculas d’aiga al meteis endrech.
Segon l’Agéncia Espaciala Indiana, lo pòl sud lunar poiriá conténer tanben de glaç dins de cratèrs, e cal poder trobar mai de pròvas scientificas per o poder confirmar sul satellit de la Tèrra. En mai d’aquò, los indians ne vòlon saber mai sus l’origina de la Luna, la composicion de sa superfícia e l’istòria geologica d’aquesta.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
