Son identificadas doas sosespècias de Leon de las Balmas
Una còla internacionala de cercaires del Centre Suedés de Paleogenetica analizèt 31 sequéncias mitocondrialas del genòma de la preïstorica espècia felina Leon de las Balmas (Panthera spelaea) e trapèt qu’aquela espècia escandilhada aguèt, au mens, doas sosespècias pendent lo Pleistocèn. Los cercaires, en mai d’aquò, confirmèron que lo leon actual e aquela espècia preïstorica son doas espècias desparièras.
Totun, e segon aquela còla de cercaires, ambedoas espècias aurián qualqu’unas caracteristicas comunas per çò que fa al comportament animal, coma poiriá èsser viure en grop o encara los rituals d’acoblament. Lo moment qu’ambedoas espècias se desseparèron es encara jos discussion. Pasmens, “lo Leon de las Baumas foguèt un dels predators mai grosses de l’Edat Glaciala que s’espandiguèt dempuèi Euròpa, Asia e fins a America del Nòrd. E podèm confirmar que la sieuna extincion se passèt fa sonque 14 000 ans, çò diguèt Love Dalén, scientific d’aquel centre de paleogenetica suedés”.
Lo genòma mitocondrial de 31 leons
A l’estudi, Dalén e lors collègas estudièron amb prigondor lo genòma mitocondrial de 31 leons de las caunas a mai d’un fossil plan conservat nomenat Spartak, un especimèn que moriguèt fa solament 28 000 annadas e que poiriá èsser lo fossil de mamifèr predator preïstoric melhor conservat fin a uèi lo jorn. Amb aquel genòma los cercaires pogueren identificar doas sosespècias desconegudas fins al moment actual.
Una d’aquela sosespècia demorèt a Beringia (Iacotia, Alaska e Yukon) del còp que l’autra visquèt a Euròpa e Asia. La sieuna distribucion geografica doncas, seriá consistenta amb de fossils trapats de cran de leon de las balmas de Beringia, fòrça mai grosses que los de la sosespècia que visquèt en Euròpa.
En mai d’aquò, los cercaires descubriguèron qu’aquelas doas sosespècias de leon preïstoric aguèt de prèsas diferentas, car lo leon de Beringia aviá una cèrta preferència per de bisonts e cavals del còp que lo Leon de las Balmas europèu preferissiá mai caçar de cèrvis.
La resulta d’aquel estudi tanben demostrèt qu’aquelas sosespècias de leon de las caunas se desseparèron fa aperaquí 1,5 milions d’annadas de l’espècia actuala e qu’ambedoas se serián tanben desseparat entre elas meteissas fa sonque 500 000 ans. “L’estudi suggerís que lo Leon de las Balmas foguèt una espècia desparièra del leon modèrn, çò confirmèt David Stanton, d’aquela còla scientifica. L’analisi mitocondrial mostrèt doas sosespècias de leon desseparadas geograficament per l’èst o l’oèst mondial”. L’estudi foguèt publicat al numeric Scientific Reports.
La Redaccion
