SE POIRÀ PAS JAMAI VIURE SUS MART ?
Un estudi realizat pel Laboratòri Nacional de Los Alamos avalora çò de necite a la terraformacion d’una planeta coma Mart. Dempuèi 1991, degun aviá pas imaginat çò que caliá far per poder terraformar aquela planeta. Mas ara una còla d’aquela universitat, dirigida per Nina Lanza, presenta çò que caldriá far per poder viure sus la Planeta Roja.
“Dempuèi aquela luènha epòca, avèm plan melhoradas las coneissenças scientificas de Mart, e la geoengenhariá, coma poder mandar una fusada sus aquela planeta, aital coma la biosciéncia. Aquò, çò diguèt Lanza, balha l’escasença de veire cossí podèm terraformar aquela planeta e veire s’es possible o pas d’o far”.
Pr’amor que terraformar Mart implicariá de caufar l’atmosfèra de la planeta amb de micròbis creats pels umans qu’ajudèsson a crear d’oxigèn per mejan de la fotosintèsi. Sonque aquò ajudariá a balhar pro d’oxigèn a Mart e puèi a aver d’aiga liquida e desvolopar una vida complèxa. Mas d’en primièr, segon Lanza, cal veire se los còstes e los risques pòdon èsser confrontats o se val pas la pena d’o far.
Dins l’estudi, los cercaires balhèron la coneissença actuala sus l’aiga, lo dioxid de carbòni e la composicion del sòl de Mart, e portèron divèrsas proposicions sus cossí aumentar la temperatura de la Planeta Roja e cossí far créisser la pression atmosferica e l’oxigèn marcians. Uèi, la tecnica umana poiriá far montar la temperatura de Mart de qualques desenats de gras en sonque qualques decennis.
Se demanda mai de compreneson
Los cercaires d’aquela còla demandèron, ça que la, una melhora compreneson de la fisica, de la quimia e de la biologia restacadas a aquela planeta. Sonque aital se poirà avançar mai en l’exploracion, la biosciéncia e l’engenhariá atmosferica a respècte de la Planeta Roja. Se foguèsse aital, çò apondèron los cercaires d’aquel universitat, Mart poiriá venir un oasi terrèstre.
“De desvolopar de tecnologias per viure sus Mart, coma aver de plantas plan resistentas, un melhor sòl e un bon modèl ecologic, tanben poiriá balhar de benfaches a la nòstra planeta, çò diguèt Lanza. Mart poiriá èsser un laboratòri perfièch per far de provaments scientifics sus la vida sus d’autras planetas e poder aital aviar de nòvas teorias”.
Segon aqueles cercaires, la recèrca continua entraïna un progrès scientific independentament de l’eventuala terraformacion de Mart. Fins alara, çò diguèt Lanza, sabèm pas se terraformar la Planeta Roja es possible fisicament o biologicament. Pr’amor que terraformar Mart poiriá dobrir la pòrta a d’autras planetas puèi. L’estudi foguèt publicat dins lo numeric Nature Astronomy.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Fotografia principala: Flyingsinger/CC.
