Ja fasiá de temps que los scientifics sospechavan que la malautiá d’Alzheimer e l’apnèa del sòm avián un ligam. Pasmens, sonque ara s’es pogut demostrar scientificament. D’efièch, una còla de cercaires poguèt trapar que las placas amiloïdas (toxicas pel cervèl) naisson e s’espandisson del meteis biais en de malauts qu’an d’apnèa e en d’autres que patisson Alzheimer.
L’apnèa del sòm es una plan seriosa malautiá que pòt arribar d’arrestar totalament l’alen d’una persona mentre qu’es a dormir. Uèi lo jorn, se sap qu’es plan mai comuna que se pensava e, d’efièch, la patisson 936 milions de gents sus tota la planeta e mai del 30% de las personas vièlhas.
D’autre caire, Alzheimer es la forma mai comuna de deméncia umana e mai del 70% de las personas que son victimas d’una deméncia son malauts d’Alzheimer e l’edat seriá un dels factors clau de desvolopament d’aquela tras que grèva malautiá. “Ara sabèm que se se patís l’apnèa del sòm quand òm es mai jove, la probabilitat de desvolopar la malautiá d’Alzheimer es mai nauta, çò confirmèt Stephen Robinson, de l’Escòla de Santat e de Sciéncias Biomedicalas de l’Universitat RMIT a Austin, en Tèxas. E se qualqu’un patís Alzheimer, las possibilitats de patir tanben a l’encòp l’apnèa del sòm son tanben fòrça mai elevadas”.
Per ansin, perqué las doas malautiás son restacadas entre elas es encara un mistèri, mas los cambiaments biologics que se fan en las doas malautiás an pogut èsser, fin finala, associats. “Avèm estudiat las placas amiloïdas del cervèl uman e sustot las de las personas que patisson l’apnèa del sòm, çò apondèt Robinson. La descobèrta es plan importanta pr’amor que dobrís de nòvas draias per tal de comprene perqué se desvolopa la malautiá d’Alzheimer”.
Un estudi aprigondit
La còla de Robinson estudièt los senhals que daissava la malautiá d’Alzheimer dins l’ipocamp de 34 personas mòrtas e tanben de 24 personas qu’avián patit l’apnèa del sòm. Cerquèron totjorn la preséncia de placas amiloïdèas. Pels qu’avián patit d’Alzheimer aquelas placas sorgissián primièr dins l’airal cortical e puèi s’espandissián per l’ipocamp abans de se desvolopar totalament per tot lo cortèx. Totun, dins lo cervèl de las gents qu’avián patit l’apnèa la preséncia d’aquelas placas èra fòrça mai fòrta.
“Los qu’avián patit l’apnèa, çò confirmèt Robinson, avián aquel tipe de placas dins l’airal cortical e mai pròchas de l’ipocamp, qu’es justament lo luòc ont apareissson d’en primièr en las personas que patisson Alzheimer. L’estudi foguèt publicat dins la revista numerica Sleep.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
