Segon semblariá, l’espècia ominina Paranthropus boisei èra capabla de crear d’aisinas. Los paleoantropològs an descobèrt una esqueleta parcial d’ominin qu’inclutz d’òsses de man e de pè associats a Paranthropus boisei, una espècia d’ominin que visquèt en Africa de l’Èst entre ara fa 2,3 e 1,2 milions d’annadas. E lo fossil permet pensar que partejava d’adaptacions manipulativas e bipèdas claus amb lo genre Homo. Pr’amor que la morfologia de la man convergís amb la dels gorilhas e tanben permet escalar.
Fins ara se pensava que los primièrs membres del genre Homo utilizavan d’aisinas de pèira. Pasmens, las descobèrtas d’aisinas de pèira de 3,3 milions d’annadas a Lomekwi e d’artefactes Oldowan de 3 milions d’annadas al costat d’una dent de Paranthropus a Nyayanga, Kenya, reviscolèt lo debat sus la possibla utilizacion d’aisinas per part d’autras espècias.
Mai d’una espècia capabla
“Quand Mary Leakey descobriguèt lo crani de Paranthropus boisei al costat d’artefactes de pèira d’Oldowan, foguèt declarat lo fabricant d’aisinas de pèira mai ancian jamai descobèrt, çò diguèt la doctora Carrie Mongle, de l’Universitat de Stony Brook, e se Paranthropus fabricava e utilizava d’aisinas es estat debatut des d’alara, pr’amor que i a pas d’òsses de man coneguts que pòscan èsser definitivament atribuits a aquel genre.”
Al nòu estudi, los autors estudièron una esqueleta ominina parciala recuperada entre 2019 e 2021 en Koobi Fora. Foguèt nomenat KNM-ER 101000, e aperten a un especimèn que visquèt ara fa aperaquí 1,52 milions d’annadas. Las dents e lo cran correspondon a de fossils de Paranthropus boisei documentats ja abans.
“KNM-ER 101000 inclutz d’òsses de la primièra man e del pè associats amb las dents e lo cran de Paranthropus boisei”, çò diguèron los cercaires. E partejan de caracteristicas amb los umans modèrnes e los monins africans, çò diguèron los expèrts. »
Per ansin, las proporcions de longor del polze-det confirman que Paranthropus boisei aviá una destresa similara a la dels umans, mas benlèu amb mens de precision. Per contra, d’autres òsses de la man semblan d’ osses de gorilla, çò que poiriá aver donat a Paranthropus boisei una presa poderosa utila per l’escalada.
“Las descobèrta doncas, suggerís que Paranthropus boisei èra capable de crear e d’utilizar d’aisinas en tot sostener la dicotomia de diètas desparièras de Paranthropus e Homo”, çò diguèron los cercaires. Aquò aufrís una nòva vision sus l’anatomia foncionala de Paranthropus e esclairís de modèls mai largs de l’evolucion de la man dels ominins e l’usatge d’aisinas.” La descobèrta foguèt publicada al numeric Nature.
La Redaccion
