Lo movement Gardarem la Tèrra, amassa amb d’autras organizacions culturalas, vòl remembrar la figura del grand istorian e escrivan occitan Robèrt Lafont lo pròplèu 1r d’abril a 14.30 oras en Nimes, al Grand Auditorium d’aquela vila. Gardarem la Tèrra es un movement alternatiu d’accion e reflexion que nasquèt en 2003 aprés l’amassa contra l’OMC e que Robèrt Lafont ne foguèt un dels fondators.
L’omenatge aurà la participacion de mantuns representants de divèrsas associacions culturalas occitanas e catalanas a mai de Gardarem la Tèrra, coma lo CAOC catalan e tanben dels professors universitaris e cercaires Catherine Bernie-Boissard e Felip Martèl, a mai de la jornalista de Ràdio Lenga d’Òc Gisèla Naconaski. L’omenatge vòl celebrar l’anniversari de la naissença de Robèrt Lafont (1923-2009).
Per ansin, Gardarem la Tèrra començarà l’omenatge a Lafont al Grand Auditorium de Nimes amb la lectura d’un tèxt de Lafont, puèi lo professor Jaume Figueras parlarà de Lafont e los catalans e los cercaires occitans Bernie-Boissard e Martèl parlaran de la pensada de Lafont e cossí es encara de besonh la conéisser. L’omenatge aufrirà tanben lo visionat d’un documentari sus la vida e òbra de Lafont.
Un istorian singular
Robèrt Lafònt nasquèt en Nimes ara fa 100 ans per estudiar a L’Universitat de Montpelhièr. Foguèt totjorn una persona plan restacada amb la lenga e cultura occitanas e amb una vision universala. Foguèt cercaire e escrivan (amb mai de 100 òbras) e participèt al long de tota la sieuna vida en la lucha per la dignitat e l’emancipacion del pòble occitan, al costat de totes los autres pòbles de la planeta.
De còps visionàri, totjorn demanava qu’Occitània foguèsse tanben protagonista de l’istòria (sovent dublidada). Una Occitània qu’uèi tanben vòl lo remembrar pr’amor del dialòg que totjorn prepausèt, una valor tras que necessària al moment actual. Car la riquesa de la pensada sonque pòt arribar en tot respectar, cossí demanèt totjorn Lafont, la diversitat culturala en sinergia amb la biodiversitat, çò es la vida de totes los èsser vius del mond. Tot un programa ecologic que lo movement Gardarem la Tèrra tanben vòl remembrar a travèrs d’una de las figuras occitanas pus importantas del sègle XX.
La Redaccion
