Una de las caracteristicas pus espandidas uèi lo jorn sus perqué capitèt la nòstra espècia e pas la neandertaliana es lo metòde de caça. Segon lo vejaire tradicional de l’arqueologia, l’òme de Neandertal auriá caçat las prèdas prèp dels animals e per ansin èra pus nafrat. Homo sapiens sapiens, per contra, auriá eslançat de javelinas pus luenh de las presas e pr’aquò capitèt de subreviure. Mas ara un nòu estudi demòstra qu’aquò foguèt pas aital.
De còps, la sciéncia es demostrada amb la practica. Fins ara degun aviá practicat amb de lanças neandertalianas. Una còla de cercaires, dirigida per l’arqueològ Annemieke Milks assagèt de far de còpias de javelinas trobadas en Schöningen, Alemanha, de fa 300.000 annadas, e doncas, neandertalianas. La suspresa arribèt amb la resulta d’aquela espròva : foguèron fachas per caçar de prèdas luenhanas. E doncas foguèt demostrat que Neandertal auriá caçat pas prèp de las prèdas.
L’espròva practica arribèt aprèp divèrsas qüestions scientificas. Mai d’una espècia ominina ancessora de la nòstra espècia, coma Homo erectus, auriá ja un còrs capable de getar de javelinas fa mai de 2 milions d’annadas. Perqué alara los neandertalians podián pas o far coma es encara uèi afirmat per l’arqueologia tradicionala ?
Milks amassèt en 2015 (maugrat aquò la resulta es estada ara publicada al numeric Scientific Reports) una còla de 6 lançaires de javelinas professionals per practicar amb de còpias de javelinas neandertalianas. E maugrat que divèrsas se trinquèron quora foguèron utilizadas, d’autras poguèren finir amb mai d’un 50% de succés segon la distància.
D’armas gaire precisas
Las donadas publicadas en aquel estudi confirman mai de 100 lançaments (102) que faguèron blanc a cinc mètres, çò es mai d’un 58% dels còps. La chifra venguèt pus redusida a una distància situada entre 10 e 15 mètres (25%) e encara mai a 20 mètres (17%). Cap dels lançaires poguèt arribar a far blanc a 25 o mai mètres de distància. Son las primièra chifras sus aquel biais de caça neandertaliana jamai fachas fins uèi lo jorn.
Totun, de professionals mai capables poguèren arribar a far blanc fins 33% dels còps. E qualqu’un poguèt (un solet còp) arribar a una distància de 31 mètres. Los atletas èran premanits per lançar de javelinas lo pus luenh possible e benlèu pr’aquò fòrça còps capitèron pas.
Mas “l’adaptacion arribèt lèu e en tot assajar d’o far mai luenh foguèt demostrat que quora i aviá mens distància la javelina èra pus precisa, çò confirmèt Milks. E mai encara, son de chifras que son una capitada e maugrat que parlan pas d’una arma de nauta tecnologia es segur que foguèron fachas per de neandertalians per caçar de prèdas luenhanas. Per ansin, se pòt conclure que foguèron dessenhadas per volar”.
A mai, lo solet còp que s’es trobada una evidéncia de lança neandertaliana en la caça foguèt quora se trapèt un còp una punta fossila prèp d’un cèrvi. Çò que vòl pas dire que Neandertal caçava las prèdas prèp de las meteissas. “Se pòt pas afirmar que la caça foguèsse facha totjorn prèp de la prèda, çò confirmèt l’antropològ e biològ Neil Roach, de l’Universitat d’Harvard. Mas las chifras encara fan dobtar d’autres paleontològs coma Steven Churchill, de l’Universitat de Duke.
L’antropològ Milks vòl ara visitar de caçaires-culheires modèrns amb de lanças per caçar e far una segonda espròva amb aquelas còpias de javelinas neandertalianas. L’espèr es poder demostrar qu’Homo sapiens neandertalensis èra pas gaire bon quora caçava de prèdas luenhanas mas que o podiá far e de manièra abituala: la discussion, doncas, contunha d’èsser dubèrta pr’amor que ara ja i a lo dobte.
La Redaccion
