Malgrat era pèrda ara hè dues annades, de Tònho Castèt, eth grop de musica aranés es Paums, un des mès coneishudi e dilhèu eth mès celèbre encara aué dera Val d’Aran, causic tornar as scenàris e balhar una naua vida ath grop, pr’amor dera sua istòria e tanben entà omenatjar es sòns seguidors. Atau, e de manèra totaument suspresiva, es nàus PAUMS e qu’ara an eth nòm d’ARANERS dèren un concèrt en pòble de Lhèida de Vilanova de Segrià eth passat 15 de junh.
Eth concèrt siguec organizat pera associacion de hemnes dirigida per Eva Marimon e interpretèren diuèrsi temes populars en aranés, era polida version dera lengua occitana dera Val d’Aran. Eth grop Es Araners qu’ei ara format per 5 compausants dont tres son ancians compausants deth grop Es Paums e que decidiren contunhar damb eth gigantàs trabalh de Tònho Castèt, que moric ara hè 2 ans.
Un polit concèrt
Es tèmes qu’Es Araners interpretèren siguèren bères ues cançons populars que ja auien jogat es ancians Paums a mès de d’autes composicions nàues de Jèp de Montoya e Xavi Gutièrrez, tot damb era musica de Jaume Masana, que recebec non he guaire eth Prumèr Prèmi Joen Sapiéncia Occitana pr’amor deth sòn trabalh entara divulgacion dera lengua e cultura occitanes.
Mès es Araners non an pro damb aguest concèrt (que siguec ua beròia capitada) e ja an anonciat qu’enguan ne haràn diuèrsi mès e encara en 2026, çò qu’ei tostemp ua bona notícia entara cultura aranesa. Cau rebrembar qu’aué eth grop d’Es Araners (dont 3 que son ancians Paums) ei format pers següents musicians; Joan Masana Jovells, votz e baish (Es Paums), Josep Rebull Curcó, saxofòn e guitarra (Es Paums), Miquel Curto Frau, bateria e votz (Es Paums), Imma Farre Monells, teclat, e Antoni Llovera Pascual, guitarra.
Des de Sapiéncia Occitana que volem desirar fòrça sòrt ad aguest nau grop musicau aranés pr’amor que sabem qu’Es Paums portèren era musica e lengua aranesa per tot durant annades e se aguesta ei era naua tòca d’Es Araners cau tostemps sostier-les, pr’amor que poirien tornar a èster un bon nautavotz dera cultura aranesa aué. Fòrça sòrt Araners !
Era Redaccion
