I a de còps que Sapiéncia vòl soslinhar cèrts beneficis per la santat que pòdon aver cèrts aliments. Amb l’avocat aquò tanben es aital. Ara un estudi ven de confirmar que ne manjar un de biais setmanièr es restacat totjorn amb un mendre risc a l’ora de patir cèrtas malautiás cardiovascularas, pr’amor que produsís un efièch parièr al de l’òli de l’oliva o los fruchs secs.
L’estudi foguèt publicat aquesta meteissa setmana al numeric editat per l’Associacion Estatsunitenca del Còr e confirma que l’avocat a un naut contingut en fibra a mai de grasas insaturadas qu’ajudan a contrarotlar cèrtas malautiás coma lo colesteròl.
Un long estudi
Per arribar a aquela conclusion una còla de cercaires de l’Escòla TH Chan de Santat Publica d’Harvard observèt 68 780 femnas e 41 700 òmes al long de 30 annadas. Pendent aquela epòca totas aquelas personas patiguèron 9 185 malautiás coronàrias e 5 290 accidents cerebrovasculars. Per ansin, e segon los cercaires que realizèron aquel estudi, cal manjar, aumens dos còps la setmana mièg avocat per poder redusir fins a un 16% lo risc de patir aquelas malautiás.
Segon Lorena Pacheco, que dirigiguèt l’estudi “i a cèrts mecanismes biològics potencials que son ajudats per l’avocat que balha mai santat a l’ora de los protegir, dont l’acid gras mono-insaturat que redusís l’ipertension, l’inflamacion e la sensibilitat a l’insulina. A mai, l’avocat a colesteròl vegetal e fibra soluble que pòt redusir lo colesteròl marrit. E tot aquò se ne manjam sonque un de biais setmanièr”.
La Redaccion
