La descobèrta d’una nòva espècia de fauna o flora en la planeta Tèrra es totjorn una bona notícia. Ongan, una còla internacionala de cercaires descobriguèt una nòva espècia d’arbre tropical en las forèsts de las montanhas Usambara, en Tanzania. La coneissença umana es uèi doncas, un pauc mai granda.
La nòva espècia trapada en las montanhas tanzanianas d’Usambara aperten al genre Mischogyne, la familha Annonaceae e la tribú de Monodoreae e es estada classada coma un arbre tropical amb de mesuras mejanas o pichonas.
Lo nom de la nòva espècia es Mischogyne iddii e es un arbre que pòt arribar fins a 20 mètres de nautor. A mai, a un tronc cilindric amb un diamètre de 45 centimètres e de flors blancas. La descobèrta de la nòva espècia se debanèt pendent una mission d’exploracion de plusors cercaires scientifics que volián estudiar lo ròtle dels arbres dins lo procès que la seuva pòt aver per chucar de CO2.
“La descobèrta se debanèt quora voliam comprene melhor los factors environamentals que se passan a l’ora de chucar de carbòni lo bòsc, çò diguèt Anday Marshall, de l’Universitat de York. Es una nòva espècia del genre Mischogyne que los scientifics cresián abans que sonque podiá èsser trobada en Africa de l’Òest”.
Una espècia que cal protegir
De donadas scientificas confirman que Mischogyne demorava fins uèi en Africa de l’Òest. Mas ara foguèt trapada a l’èst e a l’oèst de las montanhas Usambara, en Tanzania, en Africa de l’Èst. Un dels luòcs es dins la Reserva Naturala d’Amami e l’autra dins una reserva privada de Mazumbai.
La nòva espècia demorava en naut d’aquelas montanhas, e ara que se sap qu’existís, cal prene de mesuras per la protegir pr’amor que lor populacion es plan pichona. Solament aital se poiriá empachar que demoresse una espècia isolada pr’amor que l’agricultura s’espandís de mai en mai en la region.
Segon los cercaires cal ajudar las bòscs se restacar amb d’autras selvas per ajudar las espècias a s’adaptar al cambiament environamental actual . En mai d’aquò, los scientifics soslinhèron l’importància d’aquelas montanhas coma una de las reservas de biodiversitat pus importantas d’Africa. L’airal es un refugi per d’ancianas espècias qu’un còp èra cobrissián tot l’Africa tropicala. La descobèrta foguèt publicada al numeric Kew Bulletin.
La Redaccion
