Home DIVÈRSES LOS GRANDS PRIMATS SERIÁN PUS INTELLIGENTS QUE LOS AUSTRALOPITÈCS
LOS GRANDS PRIMATS SERIÁN PUS INTELLIGENTS QUE LOS AUSTRALOPITÈCS
0

LOS GRANDS PRIMATS SERIÁN PUS INTELLIGENTS QUE LOS AUSTRALOPITÈCS

0

Un nòu estudi pòt cambiar totalament lo vejaire scientific tradicional qu’afirmava que los australopitècs èran pus intelligents que los primats actuals pr’amor de la talha de lors cervèls. Aquò poiriá èsser demostrat car los traucs dels cranis dels primats actuals ont passan las artèrias serián mai grands qu’en los australopitècs.

La taxa de sang qu’arriba al cervèl es fòrça nauta.

Segon aquò, una còla de l’Universitat d’Adelaïda, dirigida per l’antropològ Roger Seymor, poguèt mesurar la quantitat de sang qu’arriba al cervèl dels primats. E la resulta confirmariá que n’i a mai en los primats actuals qu’en nòstres ancessors. La tecnica per o mesurar foguèt utilizada per estudiar fins a 96 cranis de primats actuals en mai d’11 cranis fossils d’australopitècs.

“La taxa de sang qu’arriba a la part cognitiva del cervèl dels grands primats actuals es fòrça mai nauta qu’en los australopitècs, çò confirmèt Seymor. Es una resulta susprenenta pr’amor que totes pensàvem que l’intelligéncia èra restacada directament amb la talha del cervèl, mas aquò benlèu es pas aital”.

Segon aquò, lo cervèl seriá mai desvolopat segon lo nombre de neurònas mas tanben la coneissença (or intelligéncia) d’aqueste dependriá del nombre de connexions qu’a, çò es de las sinapsis. E una activitat sinaptica màger voldriá dire una capacitat mai nauta de tractar l’informacion. Los umans utilizam lo 70% de l’energia cerebrala en d’activitats sinapticas e aquò depend plan de la quantitat de sang qu’arriba al cervèl (pr’amor de l’oxigèn qu’i arriba).

De gorillas, chimpanzés e bonobos

Malgrat que lo cervèl uman corresponda solament al 2% de nòstre pes, utiliza fins al 20% de nòstra energia e fins al 15% de la sang que ven del còr. I a de cases de primats tras qu’intelligents, coma la gorilla Koko, que podiá usar mai de 1000 simbòls corporals per se far comprene, coma lo chimpanzé Washoe, qu’aprenguèt fins a 350 simbòls lingüistics, e coma Kanzi, un bonobo que desvolopèt una compreneson totala de la sintaxi de la lenga anglesa e que, en mai d’aquò, faguèt d’espleches de pèira.

Los traucs dels cranis ont passan las artèrias serián tanben fòrça grands.

“Cossí restacar l’intelligéncia dels grands primats actuals amb la de nòstres ancessors que visquèron fa mai de 3 millions d’annadas?”, çò demandèt Seymor. D’australopitècs coma Lucy benlèu èran pas tant intelligents. Los grands primats actuals an un cervèl parièr o mai grand que lo dels australopitècs, que fins ara pensàvem que balhavan una màger intelligéncia”.

Fins ara, doncas, se pensava que lo cervèl uman èra en naut de l’evolucion pr’amor de sa talha e de son nombre de neurònas. Totun, lo nòu estudi demostrèt que la quantitat de sang que la recebiá lo cervèl en nòstres ancessors èra mendre, en comparason amb los primats actuals.

L’emisfèri cerebral de Koko èra fins a dos còps mai grand que lo de l’australopitèc Lucy. Es possible que lo flux sanguin confirme melhor la capacitat de recebre d’informacion que non pas la talha del cervèl. E segon aquò, Koko seriá fòrça mai intelligenta. L’estudi foguèt publicat dins la revista numerica Proceedings of the Royal Society B.

La Redaccion

Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.