Maugrat que la majoritat dels umans pensan que los gats preferisson mai èsser independents e viure solets, una nòva recerca scientifica poguèt demostrar que son ligam, per rapòrt a son propietari, es basat, sustot, en la seguretat que cerca l’animal. En açò son gaire diferents dels cans o mainatges.
Per ansin, e segon aquela recèrca, los gats serián de mamifèrs qu’an un comportament pròche als mainatges o los cans. E las caracteristicas e abilitats d’aquesta espècia devon èsser consideradas desparièras a las dels canids, çò soslinhèron los cercaires.
“Maugrat l’imatge que n’avèm, los gats pòdon aver cèrta flexibilitat sociala per rapòrt als umans, çò diguèt Kristyn Vitale, de l’Universitat d’Oregon e que dirigiguèt lo nòu estudi sus los gats. La majoritat dels gats son ligats amb lors propietaris a travèrs de la cerca de la seguretat, sustot quan son en nòus environaments”.
Un nòu environament
Aital, los mainatges, quora son en de nòus environaments, vòlon èsser, pendent lo començament, amb la persona que lor balha de seguretat. Un còp aquò fach, tornan explorar l’environament. Çò de meteis se passa amb los gats apuèi far divèrsas pròvas scientificas.
Durant una d’aquelas pròvas, poguèt èsser demostrat que, dins un nòu environament, los gats vòlon èsser prèp de son propietari, au mens pendent una amassada que pòt demorar fins a doas minutas. E 65% dels gats mostrèron èsser plan pròches, maugrat l’esterotipe d’animal independent, a lors propietaris.
Segon aquò, los gats son d’animals qu’an una relacion establa amb los umans. Aquel tipe de relacion comencèt quand los gats dintrèron als ostals umans, fa de milièrs d’annadas. Un trach que los gats que vivon en carrièra o al bòsc an pas. E pr’aquò ara los meteisses cercaires vòlon conéisser que fa néisser dins los gats la socializacion e cossí aquela se desvolòpa a travèrs de la cerca de seguretat. L’estudi foguèt publicat al numeric Current Biology.
La Redaccion
