L’OCCITAN A L’UNIVERSITAT DE BARCELONA
Barcelona, caplòc de catalonha, vòl demostrar, un còp mai, que l’occitan tanben es la lenga oficiala dels catalans. Aquò, malgrat que l’iniciativa siá universitària, es una bona escasença pels catalans per aver un primièr contacte amb l’occitan e puèi contunhar l’experiéncia amb l’aprenentatge de l’aranés, la varianta gascona dialectala de la Val d’Aran.
Aital, e pendent lo mes de mai, l’Universitat de Barcelona (UB) vòl promoure l’aranés e i aurà divèrses eveniments culturals qu’an coma tòca finala espandir la coneissença de la lenga d’òc entre los catalans e catalanas. De remembrar que l’UB es una universitat fondada en l’an 1450 e qu’es un organisme amb prestigi internacional.
Un dels primièrs actes se debanèt ièr, 4 de mai, a l’Aula Magna de l’Universitat de Barcelona. Lo professor e cercaire de l’Universitat de Girona, Xavier Lamuela, donèt una conferéncia qu’aviá lo títol de “La posició de l’aranés dins el gascó”, per introduire lo grand public a la parla aranesa e la sieuna posicion dins l’occitan. De soslinhar que Xavier Lamuela foguèt tanben president del Conselh de la Lenga Occitana.
Mas i aurà tanben mai d’eveniments. Deman, divendres, a 18:00 h i aurà tota sòrta d’actuacions als jardins Ferran Soldevila de l’Universitat de Barcelona. L’eveniment finirà amb un concèrt de la cantaire aranesa Alidé Sans a 19:00 h, que mostrarà un còp de mai la beltat de la lenga d’òc en tot cantar lo sieu darrièr disc Henerècla (publicat en çò d’Hètaman en 2019). Lo public es convidat a reservar un luòc al concèrt a travèrs del corrièr documentació.sl@ub.edu .
L’aranés en Catalonha
Dimecres 18 de mai, a 12:00 h serà Jusèp Loís Sans Socasau, president de l’Institut d’Estudis Aranesa-Acadèmia dera lengua Occitana (IEA-AALO) que donarà una conferéncia sul present, passat e futur de l’aranés coma varianta occitana en la Val d’Aran mas tanben en tot Catalonha a travèrs de la sieuna normativa lingüistica. La conferéncia aurà coma títol “Era Acadèmia Aranesa dera Lengua Occitana: passat, present e futur dera normativa”. L’eveniment se debanarà a l’Aula Magna de l’Edifici Històric de la UB. De remembrar tanben que Sans Socasau es un occitanista plan conegut e tanben director de politica lingüistica a la Val d’Aran.
A mai d’aqueles eveniments, pensats per conéisser amb mai prigondor la situacion de l’aranés, varianta occitana, en Catalonha e Aran, l’Universitat de Barcelona comencèt un cors presencial d’aranés del nivèl A1 ongan, que foguèt considerat coma una bèla capitada. Una polida iniciativa que, de segur, cal contunhar, se volèm espandir lo nivèl de coneissença de l’occitan en çò nòstre e qu’esperam que tornarà a se repetir lèu lèu.
La Redaccion
