Lo Saut de l’Àngel es lo saut d’aiga mai naut de tota la planeta e a una nautor de 979 mètres. Es situat al replanat d’Auyantepuy, dins lo Pargue Nacional de Canaima, en Veneçuèla. Lo replanat es a 2 535 mètres de nautor e a una superfícia d’aperaquí 700 Km2. Lo pargue nacional de Canaima foguèt creat en 1962 e es lo mai grand de la Tèrra, amb mai de 30 000 Km2 protegits.
Canaima foguèt classificat en 1994 coma Patrimòni Mondial de l’Umanitat e lo Saut de l’Angel es uèi una de las 7 meravilhas del mond. Lo saut es dins lo fluvi Chrurun e la siá vision es estonanta per totes aqueles que pòdon lo veire. Foguèt descobèrt en 1937 per l’estatsunitenc James C Àngel, que i viatjava amb avion. Malgrat lo nom actual, los indigènas d’aquela region lo coneisson coma Kerekupai-Merú o “lo Saut al Luòc mai Prigond”.
Encara uèi i a cèrta discussion scientifica sus la descobèrta del Saut de l’Àngel, car plusors cercaires confirmèron que foguèt trapat per l’explorador Fernando de Berrío, gobernador de l’airal pendent la fin del sègle XVI. D’autres encara afirman que foguèt l’explorador Ernesto Sánchez de La Cruz, que descobriguèt lo saut en l’an 1910 e o confirmèt al Ministèri de Minas en Caracas aquel an.
Pasmens, en 1937, James C. Àngel viatgèt fins al luòc amb un pichon avion a truquèt ailà contra la selva. Calguèt far una expedicion de rescat per los sauvar. Mas tota la planeta descobriguèt alavetz lo saut e li foguèt balhat lo nom de l’òme que i èra anat amb avion.
Lo saut foguèt puèi mesurat per la jornalista estatsunitenca Ruth Robertson en 1949. Lo viatge foguèt finançat per la National Geographic Society. Encara uèi es malaisit d’i arribar car cal crosar la selva, un fach que tanben pòt èser fach, totun, amb avion. Los aimants de l’aventura, pasmens, preferisson d’i arrivar a pè. De soslinhar que la melhor epòca per lo visitar es entre los meses de junh e desembre, quand lo fluvi a mai d’aiga e lo saut es pus estonant.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Aqueste article es tanben publicat dins Naturaleza Salvaje, un numeric de geografia e l’environament, que Sapiéncia n’a un acòrdi de cooperacion
