LO MAMIFÈR LO PUS ANCIAN
La descobèrta del mamifèr pus ancian de la planeta provoquèt un cambiament dins la cronologia de l’istòria biologica dels mamifèrs, car demorèt mai de 20 milions d’annadas abans de çò qu’òm pensava. Per ansin, cal rescriure tornarmai l’istòria evolutiva dels mamifèrs, pr’amor de çò descobèrt ongan.
Lo nòm del mamifèr es Brasilodon quadrangularis. L’estonament dels cercaires venguèt màger a l’ora d’estudiar lo fossil, car òm sospechava pas que foguèsse estat un mamifèr. Mas una analisi prigonda de las sienas dents entraïnèt poder confirmar qu’èra, d’efièch, lo mamifèr lo pus ancian de la planeta, car demorèt ara fa mai de 225 milions d’ans. La descobèrta de Brasilodon foguèt publicada al numeric scientific Journal of Anatomy.
La confirmacion de l’epòca que visquèt Brasilodon arribèt après que los paleontològs analizèron la maissèra del fossil. Lo mamifèr preïstoric demorèt ara fa aperaquí 225 milions d’ans a Brasil, lo luòc ont foguèt descobèrt en 2003, e semblava, mai que mai, una sòrta de musaranha. Pasmens aviá cèrtas dents que sonque tornavan a créisser un còp pendent la sieuna vida.
Aquò es una caracteristica tipica sonque dels mamifèrs. Fins ara òm pensava que los mamifèrs avián nascut fa 200 milions d’ans, après la gigantassa extincion que patiguèt la planeta entre las edats del Permian e lo Triassic. Mas Brasilodon demorèt 20 milions d’ans abans. E doncas Brasilodon serà considerat dempuèi ara coma lo primièr mamifèr fossil e Morganucodon daissarà aquel luòc en l’istòria evolutiva dels mamifèrs (e que visquèt fa sonque 205 milions d’ans).
Una descobèrta polemica
Pasmens, aquela caracteristica tipica de Brasilodon es pas la soleta qu’entraïna poder inclure lo mamifèr dins aquel genre animal. Cal encara, segon qualcunes paleontològs, poder demostrar que las primièras dents de l’animal foguèron dents de lach. Sonque aital pòt òm demostrar qu’un animal es un mamifèr. Mas aquò pòt pas èsser demostrat pr’amor que parlam d’un fossil. D’autres paleontològs, encara, afirman que amb l’estudi ara fach de las dents de Brasilodon, ja n’i a pro per poder confirmar que foguèt un mamifèr.
« Las dents de Barsilodon foguèron plan analizadas scientificament, çò diguèt Moya Meredith Smith, del King’s College de Londres. La resulta es definitiva e permet poder afirmar plan que Brasilodon foguèt un mamifèr. Çò que cal far, per contra, es dubrir lo debat sus qué es un mamifèr per rapòrt a l’epòca que visquèron los primièrs ancessors dels mamifèrs. E aquò poiriá ajudar a crear una nòva istòria evolutiva dels mamifèrs a la Tèrra pr’amor que i a fòrça fossils que fins ara òm considerava qu’èran pas mamifèrs pr’amor de la sieuna edat plan mai anciana ».
La Redaccion
