MAI ANCIAN ENCARA
Lo bipedisme semblariá plan mai ancian que çò que se pensava pr’amor qu’ara, l’estudi de divèrses òsses fossils a confirmat que cèrtas espècias ancessoras de la nòstra aurián ja caminat de pè fa de milions d’annadas. Una d’aquelas seriá Sahelanthropus, qu’auriá caminat drech sul sòl tot en utilizant las mans quand èra dins los arbres.
Va sens dire que la resulta d’aquel nòu analisi provocarà tornarmai una nòva discussion scientifica, pr’amor que mai d’un cercaire afirman encara uèi que la majoritat de las espècias ancestralas omininas comencèron de marchar de doas cambas de manièra progressiva e pas d’un cop e qu’aquò, fin finala, se seriá desvolopat sonque fa aperaquí cinc milions d’ans. Sahelanthropus viviá fa 7 milions d’ans e doncas l’estudi poiriá confirmar quora aquelas espècias comencèron de caminar de drech d’un biais definitiu.
L’estudi, publicat dins numeric Nature, afirma que Sahelanthropus tchadensis ja caminava drech. E se marchar drech es la caracteristica mai umana, Sahelanthropus seriá doncas l’ominin pus ancian qu’o faguèt fa 7 milions d’ans. Tanben poiriá èsser la primièra espècia del genre Homo. L’estudi es basat sus l’analisi d’un femur que demòstra qu’aquela espècia caminava de pè mentre que los braces de Sahelanthropus confirman que tanben emplegava las mans quand èra dins los arbres. Pr’amor que tanben i demorava.
De remembrar que Sahelanthropus es una espècia ominina relativament nòva car foguèt descobèrta (Tomai) sonque en 2002 dins lo desèrt de Djurab, en Chad. Per qualques paleoantropològs sembla mai un monard qu’un ominin, e lo cervèl èra plan pichon. Pasmens, cèrtas caracteristicas fisicas dels fossils trapats èran ja susprenentas. Plusors cercaires diguèron ja a l’epòca que podiá aver caminat drech, mas la majoritat de la comunautat scientifica neguèt aquel fach en tot dire que caliá far mai d’estudis.
E se’n realizèt; lo primièr demostrava que l’esquina sorgissiá drecha del crani. Mas tanben foguèron demandats de nòus estudis. L’estudi del femur de Sahelanthropus comencèt pas brica ben pr’amor que la region qu’unissiá los òsses es pas pervenguda a l’epòca actuala. “Èra plan dificil pr’amor que l’òs foguèt devorat per un pòrc-espin, çò diguèt Jean-Renaud Boisserie, de l’Universitat de Peitieus”.
Boisserie e d’autres cercaires estudièron lo femur e lo restaquèron a mai d’una espècia actuala: de chimpanzés mas tanben de gorillas, d’orangotans e de monards del Miocèn, a mai d’Orrorin e Ardipithecus. I aviá de caracteristicas semblablas que pareissián d’indicar que marchava de pè. E lo camin evolutiu doncas foguèt lo meteis.
Un debat dobèrt
Fa sonque doas annadas, un autre estudi assegurava qu’aquel femur aperteniá a un especimen que caminava pas drech d’un biais normal. L’estudi actual ditz çò de contrari. Segon Boisserie, Sahelanthropus demorava fòrça dins los arbres e aviá de mans e de braces plan adaptats a aquò. Pasmens, quand aviá de besonh de marchar sul sòl, caminava drech. “Car demorava dins un abitat plen de selvas, de palmièrs e de paluns plan desparièr del d’uèi lo jorn. E marchar drech èra un avantatge”.
Los cercaires qu’an estudiat lo femur nègan pas que Sahelanthropus demorèsse tanben dins los arbres. Aquel tipe de locomocion, dins los arbres mas tanben de pè sul sòl, seriá estat un estadi evolutiu en divèrsas espècias omininas pendent mai de tres milions d’ans. Aital o confirmèt Rick Potts, director del Programa sus l’Origina Umana del Musèu Smithsonian. Segon Potts, fòrça espècias serián demoradas aital almens pendent quatre milions d’ans, dont Sahelanthropus.
Pasmens, parlar de bipedisme es pas respondre a la question sus se Sahelanthropus foguèt un ancessor de nòstra espècia. Mai d’un cercaire encara sospièchan que Sahelanthropus foguèt pas brica un ominin mas sonque un monard. Son epòca foguèt quora los monards e los ominins se desseparavan evolutivament. E poiriá èsser plan lo darrièr monard o lo primièr ominin. Es pas brica clar encara.
Segon Potts, los ominins evolucionèron divèrses còps a l’ora de caminar de drech, e se poiriá que plusors espècias aguèsson marchat de pè abans l’espelida dels primièrs ominins ancessors de nòstra espècia. E per aquela rason Sahelanthropus tanben poiriá èsser un monard que foguèt pas nòstre ancessor.
Pasmens, Sahelanthropus a cèrts fossils que los chimpanzés an pas; un femur que confirma que tanben marchava drech e de dents caninas pus reduchas. Orrorin e Ardipithecus tanben an aquelas caracteristicas e visquèron entre fa 6 e 4,4 milions d’annadas. Alavetz, perqué se ditz que son pas d’ominins s’an de caracteristicas morfologicas omininas ? Plusors cercaires afirman qu’es perque a aquela epòca totas las espècias èran omininas, çò es ancessoras de nòstra espècia. E, se la responsa es aquela, Sahelanthropus tanben, pr’amor que fasiá servir las mans e los braces quand èra dins los arbres mas tanben marchava drech quand èra sul sòl. E tot aquò se passèt fa 7 milions d’ans.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
