Segon un recent estudi fach per de cercaires de l’Institut de Sciéncias Geograficas de China l’acceleracion dels desplaçament dels pòls terrèstres seriá ara mai e mai rapid qu’abans. Per ansin, la fonda actuala dels glacièrs de la Tèrra auriá començat a provocar un desplaçament de l’aiga de la planeta e tanben dels pròpris pòls terrèstres vèrs l’èst que se situariá, a l’ora d’ara en 3,28 mm d’un biais annadièr.
Aital, l’impacte de l’activitat umana sus l’environament auriá provocat ja de cambiaments prigonds en l’estructura geologica de la planeta. Benlèu pr’açò plusors scientifics considèran ara que la situacion actuala de la planeta déu èsser considerada coma lo començament d’una nòva edat de la planeta, nomenada Antropocèn. Las causas dirèctas ne serián la creissença d’emissions umanas de dioxid de carbòni, una mendre biodiversitat, una màger desforestacion e una creissença del nivèl dels oceans.
En mai d’aquò, e totjorn segon aquel nòu estudi fach per de cercaires chineses, la velocitat mejana de la fonda polara entre las annadas 1995 e 2020 cresquèt mai de 17 còps per rapòrt al quite ritme desvolopat entre los ans 1981 e 1995. E aquò seriá la causa del desplaçament de l’ais de rotacion de la planeta e pas pr’amor de causas naturalas coma foguèt soslinhat ja fasiá temps per qualqu’un cercaire.
Un fach jamai debanat fins ara
De remembrar que fins ara e al long de l’istòria naturala de la nòstra planeta ja se debanèt lo quite procés mas las causas ne foguèron totjorn de factors geologics coma los corrents oceanics, o de cambiaments en la temperatura de las ròcas que i a dins las prigondors de la Tèrra. Pasmens, ara la causa ne seriá dirèctament l’activitat umana car dempuèi 1990 de centenats de milièrs de tonas de glaç patisson una fonda e se son diluïdas dins los oceans.
Pr’açò la planeta viuriá ara de cambiaments radicals dins la situacion de l’aiga de la superfícia de la planeta e aquò tanben entraïnariá de cambiaments del pes de l’aiga. E aquò provocariá tanben un desplaçament de l’ais de rotacion de la Tèrra. Qu’ara serián mai e mai rapids.
L’estudi, publicat al numeric Geophysical Research Letters, tanplan soslinhèt que l’agricultura auriá una relacion dirècta amb aqueste fenomèn geologic. Lo pompatge d’aiga sosterrànha a grana escala en de luòcs coma Califòrnia, Tèxas, Pequin o lo nòrd d’Índia tanben entraïnarián de cambiaments radicals sul pes de l’aiga de la planeta. Un fach que poiriá provocar de dangieroses cambiaments geologics sus la planeta los proplèus ans.
La Redaccion
