Un estudi recent restaca l’aument de la violéncia a las armas e al clima actual. Segon l’estudi, mai de 8000 fusilhadas se son tengudas als Estats Units en causa de nautas temperaturas. L’analisi es lo primièr qu’assòcia de fusilhadas al cambiament climatic. Pels cercaires, la pojada de las temperaturas entraïna dirèctament mai de fusilhadas dins las vilas estatsunidencas. L’estudi es estat fach per las universitats de Boston e Washington. Segon aquestas, fins al 7% de las fusilhadas an coma causa una temperatura mai nauta.
Segon aquel estudi, ara creis la violéncia pr’amor de temperaturas pus elevadas dins las regions del nòrd-èst mas tanben al Mièg Oèst. “Avèm d’evidéncias cèrtas que confirman que la temperatura jornadièra provòca aquelas fusilhadas, çò diguèt Jonathan Jay, que participèt a l’estudi. E malgrat que i aja de regions ont la creissença de la violéncia es màger, avèm trapat qu’aumenta la violéncia generalizada pertot en causa del cambiament climatic”.
Las resultas de l’estudi confirman que l’an passat cresquèt la violéncia dins aquelas regions, mai que mai durant los jorns de mai nautas temperaturas. De remembrar que las fusilhadas son uèi la màger causa de mòrt en d’adolescents e mainats als Estats Units, tanben mai encara que los decèsses per accident de veitura. E lo fach s’es encara agreujat dempuèi la pandemia, perque i a de mai en mai de temperaturas pus elevadas. Es per aquò que los cercaires demandan de nòvas politicas preventivas se se vòl reduire aquela violéncia.
Un estudi de divèrses ans
Per far aquel estudi; una còla de cercaires d’aquelas universitats estatsunidencas analisèt mai de 116.000 fusilhadas de 2015 a 2020 en las restacant amb la temperatura jornadièra. Aital trobèron que d’aquestas 7.973 aguèron per causa la calor. “La calor poiriá aver provocat aquelas fusilhadas, çò diguèt Jay. De patir mai de calor tanben buta a sortir mai de l’ostal e a rescontrar mai de personas, e aquò pòt generar mai d’agressions. Çò de mai segur es la calor e las sortidas, las doas causas”.
En consequéncia, los cercaires demandan ara mai d’arbres dins las vilas, pr’amor qu’aquò ajuda fòrça a demesir la calor e mai la violéncia dins las grandas vilas. Tanben suggerisson de plans preventius mai valents dins aquelas vilas. “L’aument dels arbres pòt demenir la calor en vila e doncas amb aquò se poiriá reduire tanben las agressions, las fusilhadas e las mòrts, çò diguèt Vivian Lyons, que dirigiguèt l’estudi. Aquò es segur e o cal pas desmembrar”.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
