La fonda de glaç d’Antartida provocarà un alentiment del corrent oceanic mai fòrt de la planeta, lo corrent circumpolar antartic. Es çò qu’an trapat los cercaires, los quals confirman que la fonda de glaç antartica a d’implicacions globalas. Segon un nòu estudi, aquel corrent serà fins al 20% mai lent en 2050 qu’a l’ora d’ara.
De fach, la fonda de glaç antartic ja auriá començat de provocar un alentiment del corrent circumpolar antartic, lo pus fòrt del Mond. Es estat confirmat per una còla de cercaires de l’Universitat de Melbourne, en Austràlia, que trabalhèron amb una còla de cercaires norvegians del centre de recèrca NÒRCE. E après o estudiar atentivament, arribèron a la conclusion qu’aquel corrent alentiriá fins al 20% abans de 2050.
Segon Bishakhdatta Gayen, “l’ocean es plan complèxe e equilibrat. Se son motor actual finís, i poiriá aver de grèvas consequéncias, dont mai de variabilitat climatica, e un escalfament global accelerat pr’amor d’una reduccion de la capacitat de l’ocean d’agir a l’ora d’absorbir lo carbòni.”
Segon los cercaires, lo corrent antartic es una barrièra per d’espècias invasivas, coma de cambarons o de mollusques, que pòdon pervenir en Antartida d’autres continents estant. Mas se lo corrent alentís, aquelas espècias atenheràn plan lo continent antartic e l’impacte serà fòrça grèu per lo ret alimentari natural, çò que poiriá cambiar la dièta des pingoïns antartics.
Lo corrent mai fòrt de la planeta
Lo corrent antartic es lo mai fòrt del Mond e fins a quatre còps mai fòrt que lo corrent del Golf. Es clau dins la circulacion termoalina, que desplaça d’aiga a l’entorn de la planeta e que liga los oceans Atlantic, Pacific e Indian e que tanben es lo principal mecanisme principal per l’escambi de calor, de dioxid de carbòni, de substàncias quimicas e de biologia dins los bacins oceanics.
Los cercaires utilizèron un superordenador e lo simulador climatic mai rapid d’Austràlia. Las projeccions foguèron analisadas puèi e foguèt alara que los scientifics trobèron que lo transpòrt de l’aiga de l’ocean de la superfícia a çò de mai prigond poiriá alentir dins un futur pròche.
Per Taimoor Sohail, se prevei qu’una mendre velocitat de transpòrt de l’aiga d’aquel corrent persistirà malgrat i aja d’emissions de CO2 mai bassas, çò que contunharà de provocar una fonda de glaç antartic. En 2015, foguèt pachat d’assajar d’empachar d’arribar a 1,5 gra de mai de temperatura globala. Uèi, los cercaires creson que ja i sèm e que la temperatura globala encara se poiriá escalfar.
L’estudi foguèt publicat dins lo numeric Environmental Research Letters, e destapa que la fonda de glaç e l’escalfament oceanic son plan mai complèxes que çò que se pensava. La fonda de glaç mena de grandas quantitats d’aiga doça dins l’ocean salat. E lo cambiament sobde de la salinitat oceanica poiriá aver de grèvas consequéncias environamentalas mondialas.
D’estudis anteriors d’aquel fenomèn avián suggerit que lo corrent antartic èra totjorn que mai rapid pr’amor de fòrtas diferéncias de temperatura. Amb lo nòu modèl scientific, los cercaires pòdon ara melhor estudiar cossí serà l’avenidor d’aquel corrent oceanic. E la resulta es pas brica positiva. Pasmens, tanben demandèron mai d’estudis d’observacion e modelizacion per assajar de trobar çò que provocarà dins l’airal lo cambiament climatic actual.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
