Segon l’IA, la màger part del Mond veirà la temperatura montar a 3°C plan mai lèu que çò qu’èra previst. Tres scientifics an combinat de donadas de 10 modèls climatics globals e, amb l’ajuda de l’intelligéncia artificiala (IA), concluson que los lindals d’escalfament regionals poirián èsser atenches mai lèu que çò qu’èra estimat abans.
Aital, l’estudi, publicat dins lo numeric Environmental Research Letters, projècta que la majoritat de las regions terrèstras definidas pel Panèl Intergovernamental sul Cambiament Climatic (IPCC) superaràn gaireben segur lo lindal critic d’1,5°C en 2040 o quitament abans.
De manièra parièra, mai d’una region son en camin de despassar lo lindal de 3°C en 2060. Çò qu’es mai lèu que çò previst dins d’estudis precedents. De regions coma l’Asia del Sud, la Mediterranèa, l’Euròpa centrala e de partidas de l’Africa subsahariana, deuriáu aténher aquel nivèl plan rapidament, çò qu’agrèuja lo risc pels ecosistèmas e per las comunautats.
La recèrca, bailejada per Elizabeth Barnes, professora a l’Universitat Estatala de Colorado, Noah Diffenbaugh, professora a l’Universitat de Stanford, e Sonia Seneviratne, professora a l’ETH de Zuric, utilizèt de donadas qu’intègran de coneissenças de climas multiples de divèrses modèls per lançar d’estimacions precedentas e fornir de prediccions regionalas mai precisas.
Una descobèrta clau
Per ansin, en utilizant l’IA, los cercaires analisèron de donadas de 10 modèls climatics diferents per predire d’aumentacions de temperatura e trobèron que 34 regions son susceptiblas de despassar 1,5°C d’escalfament en 2040. 31 d’aquelas 34 regions atenherián 2°C d’escalfament en 2040. 26 d’aquelas 34 regions superarián 3°C d’escalfament en 2060.
Segon Elizabeth Barnes, la lor “recèrca soslinha l’importància d’incorporar de tecnicas d’IA coma l’aprendissatge de transferiment dins la modelizacion climatica per melhorar las previsions regionalas e provesir d’informacions los responsables politics, los scientifics e las comunautats del Mond entièr.”
D’autre caire, Noah Diffenbaugh, apondèt “qu’es important de se centrar non solament suls auments de temperatura globala mas tanben sus de cambiaments que se passan dins de zònas localas e regionalas. Quand los lindals d’escalfament regionals seràn atenches, podèm anticipar mai clarament lo moment d’impactes especifics sus la societat e los ecosistèmas”.
“Lo cambiament climatic regional pòt èsser mai malsegur, pr’amor que lo sistèma climatic es intrinsècament mai clar en d’escalas espacialas mai pichonas e pr’amor que los procèsses dins l’atmosfèra, l’ocean e a la superfícia de la Tèrra crèan d’incertituds sus cossí exactament una region respondrà a l’escalfament a l’escala globala “, çò apondèt Diffenbaugh.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Fotografia principala: Skyseeker/CC.
