L’ATMOSFÈRA DE GANIMÈDES CONTEN D’AIGA
La sciéncia confirmèt la preséncia d’aiga dins l’atmosfèra de Ganimèdes, una luna de Jupitèr. E doncas i poiriá aver de vida, car l’aiga pòt èsser sinonim, de còps, de la preséncia d’èssers vius. La descobèrta ven de la NASA, que trobèt fa gaire de vapor d’aiga dins l’atmosfèra d’aquela luna de la planeta màger del sistèma solar. Segon los cercaires, a miègjorn i pòt aver una temperatura pro nauta per formar d’aiga liquida a partir de la superfícia de glaç del satellit.
La trobalha es importanta pr’amor que, segon l’astrofisica, ont i a d’aiga liquida i pòt aver de vida. Es pas lo solet ingredient de besonh per aver de vida; tanben cal téner de carbòni, de nitrogèn, d’oxigèn, de fosfòr e tanben de sofre. Son los sièis elements que se tròban en lo 98% dels èsser vius de nòstra planeta. E ara i poiriá doncas aver vida sus Ganimèdes, alonhat de la Tèrra de 620 milions de quilomètres.
De donavas nòvas arribèron fa gaire del telescòpi espacial Hubble que mòstran la preséncia d’una evasion termica de vapor d’aiga de la superfícia glaçada vèrs l’atmosfèra d’aquela luna. La descobèrta e la confirmacion d’aquelas donadas son estadas amassada dins un nòu estudi sus l’atmosfèra d’aquela luna de Jupitèr, publicat dins lo numeric Nature Astronomy.
Una luna desconeguda
Ganimèdes es una de las lunas de Jupitèr, e benlèu del sistèma solar, mens conegudas. Se sap solament que i a fòrça gas, que lo satellit ten un solet camp magnetic e pas gaire mai. Son diamètre es de 5268 quilomètres e près del 30% de la luna son de regions amb fòrça cratèrs, formats fa mai de 4 miliards d’annadas. Se sap tanben que i a fòrça activitat tectonica.
En mai d’aquò, ara l’Agència Espaciala Europèa (ÈSA, segon la sigla anglesa) començarà una nòva mission en 2022 vèrs Ganimèdes qu’a per tòca d’estudiar amb prigondor Jupitèr e sas lunas. La mission aurà per nom JUICE (acronim de JUpiter ICy moons Explorer, es a dire «Exploraire de las lunas glaçadas de Jupitèr») e Ganimèdes tanben serà plan estudiat, justament pr’amor d’aquela descobèrta dels cercaires estatsunidencs. La mission de l’ÈSA, pasmens, atenherà pas Ganimèdes fins en 2029. Per ansin, cal esperar fins alavetz per poder confirmar d’un biais definitiu aquela estonanta descobèrta.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
