LAS PUS ANCIANAS PÈIRAS PONCHUDAS
De cercaires en Etiopia trobèron de pèiras ponchudas que poirián aver una edat d’aperaquí 2,6 milions d’ans. La descobèrta suggerís que poirián èsser los espleches pus ancians jamai faches pel genre uman Homo. Totun, la conclusion dels cercaires es pas encara acceptada per totes los arqueològs.
La tròba se faguèt a Ledi-Geraru, en Etiopia, dins una region ont ja foguèron descobèrtas abans d’autras pèiras ponchudas e d’espleches bastits per d’ominids ancians. La còla que i aviá al luòc èra dirigida per David Braun, de l’Universitat George Washington, de la capitala estatsunidenca. Segon los cercaires, las pèiras ponchudas trapadas poirián èsser estadas fachas per d’individús ancians del genre Homo fa entre 2,6 e 2,61 milions d’ans.
Abans aquò, una autra còla ja aviá.descobèrt de pèiras ponchudas amb una edat entre 2,55 e 2,58 milions d’ans a Gona, un luòc d’Etiopia, plan pròche del primièr sit arqueologic ont ara s’es tenguda la nòva descobèrta. Fins ara, los espleches trapats a Gona èran los mai ancians dels classats coma faches per d’especimens d’Homo. Los arqueològs, totun, considèran que totas aquelas pèiras son d’espleches de l’Oldovaian pr’amor que las primièras pèiras ponchudas parièras a aquelas foguèron trobadas dins la gòrja d’Olduvai, en Africa de l’Oèst.
Una edat pas encara definitiva
L’edat de las pèiras ponchudas trapadas a Ledi-Geraru foguèt determinada pel luòc ont foguèron trapadas, un depaus de cendre volcanic e de divèrses sediments, amb lo camp magnetic cambiat. Segon los cercaires, son de pèiras que son de 50 000 ans pus ancianas que las de Gona mas que poirián tanben èsser fins a 100 000 ans mai vièlhas.
Mai de 300 pèiras foguèron trapadas ailà e prèp d’aquestas 330 òsses fossilizats d’animals coma de gasèlas e de girafas. Totun, i a d’autras pèiras ponchudas –que se sospiècha que foguèron fachas per d’australopitecids fa 3,3 milions d’ans– dins lo sit sonat Lomekwi 3, en Kenya. Aqueles poirián èsser los primièrs ominids que faguèron de pèiras ponchudas plan abans la naissença del genre Homo. En mai d’aquò, de chimpanzés e de monins actuals utilizan de pèiras per obrir de fruches e, per ansin, aquò poiriá èsser una conducha plan estenduda dins l’evolucion dels primats. L’estudi foguèt publicat dins la revista numerica PNAS.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
