UN NÒU ESTEGOSAURID PLAN CUIRASSAT
La paleontologia ven de confirmar que, a mesura que naissián d’espècias desparièras de dinosaures, cèrtas familhas d’espècias tanben arribavan amb d’armaduras dermicas de mai en mai estonantas. Es lo cas del nòu genre ara descobèrt a Fès, en Marròc, Thyreosaurus atlasicus, que viviá pendent lo Jurassic e es estat identificat, justament, pr’amor de las rèstas pòstcranianas trobadas.
Segon los cercaires, Thyreosaurus atlasicus visquèt fa 165 milions d’annadas al Jurassic Mejan en Africa del Nòrd. Foguèt una espècia plan ligada a Dacentrurus, un membre del clade Dacentrurinae dels estegosaurids.
“Thyreosaurus aperten al clade Thyreophora, un clade ont tanben i podèm trapar d’estegosaures, d’anquilosaures e d’autras espècias basalas, çò diguèt Mostafa Oukassou, de l’Universitat Hassan IId de Casablanca. Los tireofòrs, doncas, an un registre fossil extensiu, que s’espandís del Bas Jurassic al Bas Cretacèu Superior, e qu’es lo melhor conegut de Laurasia.”
Mas son de fossils plan mal coneguts e que sonque son parcials en Gondwana. En Africa, los tireofòrs podián aver aparegut ja pendent lo primièr Jurassic. I a de fossils d’estegosaurids en Marròc, en Tanzania e en Africa del Sud.
Totun, los anquilosaurids africans sonque son estats representats fins ara per l’espècia Spicomellus (Marròc). Ara l’esqueleta parciala de Thyreosaurus atlasicus, trapada dins la Formacion de El Mers III, n’es la nòva espècia que pòt representar lo clade. Lo fossil foguèt descobèrt pendent una expedicion cartografica.
“En 2021, pendent una mission geologica al sud de Boulemane, descobriguèrem un sit nòu plan ric en rèstas de dinosaures a El Mers III,” çò diguèron los paleontològs. Lo sit es sonat Boulahfa Nòrd e lo material foguèt collectat après divèrsas excursions de camp consecutivas”. Aquelas rèstas son una esqueleta pòstcraniana parciala d’un estegosaure qu’inclutz de vertèbras dorsalas e de costèlas, un òs de membre e una armadura dermica.”
Segon los cercaires, Thyreosaurus atlasicus aviá una armadura dermica estranha asimetrica, unica demest los estegosaures, compausada d’osteodèrmas espessas de fins a 4 cm, de forma subovala e subrectangulara. Una textura plan diferenta de l’observada fins ara en d’autres estegosaures. E se pensa qu’aquelas espinas èran en una posicion reclinada sul còrs de l’animal e non pas drecha.
Thyreosaurus atlasicus aviá una longor corporala estimada de mai de 6 m e aquò es un dinosaure de mesuras mejanas o grandas. L’individú trapat èra adulte, mas arribèt pas jamai a de dimensions màgers en causa de la siá mòrt.
La siá descobèrta es importanta per comprene l’istòria evolutiva dels estegosaures e d’autres dinosaures tireofòrs. “Son de descobèrtas qu’ajudan a aver una vision mai concreta de l’evolucion primitiva dels estegosaures al Jurassic Mejan african”, çò concluguèron los autors. La descobèrta d’aquesta nòva espècia foguèt publicada dins lo numeric Gondwana Research.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Fotografia principala: Sci News
