Socotra es un archipèla situat entre la mar d’Arabia e lo gòlf d’Adèn en l’ocean indian; es format de quatre illas, Socotra, Darsah, Abd a la Kuri e Samhah. Aquelas singularas illas son situadas davant la Banha d’Africa, e lo luòc mai pròche es Guardafui, a d’aperaquí 350 km al sud-èst d’Iemèn, país propietari d’aquel archipèla.
L’archipèl de Socotra se faguèt conéisser quand Windows adoptèt un dels mai coneguts de lors arbres, lo nomentat Sang de Dragon coma la siá icòna. L’archipèl a una de las flòras pus estonantas e unicas de la planeta tota car una de tres plantas d’aquelas illas es endemica del luòc e fòrça arbres e arboces tanben son tras qu’estonants. Benlèu per aquò en julhèt de 2008 l’Unesco reconeguèt l’archipèla coma Patrimòni Natural de l’Umanitat.
L’illa de Socotra se seriá desseparada del continent african quand se formèt una falha pendent lo Pliocèn al canal de Guardafui, çò que fa d’aquela illa la mai isolada de la planeta. A la meteissa epòca que se formèt l’illa, se dobriguèt tanben lo gòlf d’Adèn.
A causa del long temps que las illas foguèron isoladas del continent e pel clima e pauca aiga doça de la zòna s’es creada una flòra unica dins lo mond, fòrça vulnerabla als cambiaments de l’environament. Per ansin, òm estima que mai d’un tresen de las 800 espècias de plantas son endemicas.
D’illas isoladas
Fins a 1999, quand foguèt bastit l’aeropòrt en l’illa de Socotra, las illas de l’archipèla podián pas èsser visitadas de junh a setembre pr’amor dels fòrts vents que i sus la mar.
Lo clima de las illas es sec, semiàrid, tropical, monsònic e desertic tropical, e i a pas gaire pluèja. Quand n’i, la majoritat se debanan pendent los meses d’ivèrn, e n’i a mai dins l’interior qu’en la còsta. Pr’amor d’aquel fenomèn meteorologic i a tres tipes de terren ; d’estrechas planas litoralas, un replanat de pèira calcaria amb de caunas carsticas e las montanhas Haghier.
La flora es estonanta e cal soslinhar las espècias de Dracaena cinnabari , o Sang del Dragon , un arbre rar amb forma de parapluèjas, e qu’a una sàvia de color roja fòrça cotizada en l’antiquitat coma tint o tanben per las siás proprietats medecinalas.
Los cercaires qu’estudièron la flòra de Socotra la classèron entre las dètz populacions vegetalas amb mai perilh d’extincion de totes los ecosistèmas de la planeta. Recents estudis demostrèron que 300 de las siás 800 plantas, 90% dels reptils e gaireben totes lors cagaròls son endèmics del luòc.
E los unics mamifèrs de Socotra son ratapenadas, un fach que se debana pas en d’autres luòcs pròches a aquelas illas. L’archipèla es una region ecologica classada per la WWF, que fa partida de l’ecozòna afrotropicala e un vertadièr exemple de biodiversitat. Los bauces que i a al pè de las montanhas tanben son de formacions vegetalas meravelhosas.
La vegetacion es dominada visualament per l’arbre del cogombre, Dendrosicyos socotrana, subespècia de la ròsa del desèrt, Adenium obesum subsp. socotranum e tanben per E Euphorbia arbuscula, atanben endemica de l’illa.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Aqueste article es tanben publicat dins Naturaleza Salvaje, un numeric de geografia e l’environament, que Sapiéncia n’a un acòrdi de cooperacion
