Lo Pargue Nacional Chichibu Tama Kai (秩父多摩甲斐国立公園) es un dels luòcs mai espectacloses del Japon e benlèu de la planeta tota. Lo pargue se tròba situat fòrça prèp de la vila de Tòquio e a una estenduda totala de 1,250 km² de natura e beutat blosa.
Dins lo pargue i a una varietat de païsatges granda e lo podèm veire dempuèi un total de 18 montanhas, amb una nautor superiora als 2.000 mètres. I a de lacs, de flumes e de cascadas d’una granda beutat, de caunas, de santuaris amb mai de 2.000 ans d’antiquitat, de bòsques amb rotas de senderisme que mòstran d’espacis naturals plan polits, e de camps de flors de totas las colors.
Dins la part mai pròcha a Tòquio i a la montanha Mitake amb 929 mètres e considerada coma una montanha sagrada dempuèi l’antiquitat. A la siá cresta se tròba lo santuari Musashi Mitake, creat en l’an 90 abans de Crist.
Dins la zòna i a tanben la montanha Mite, considerada una de las montanhas mai bèlas del Japon. La montanha a tres pics, en essent lo pic occidental lo de màger nautor amb 1.531 mètres, e ont nais lo riu Akigawa , famós pel bòsc de Fagus japonica, una sòrta de fau capable d’arribar a una nautor maximala de 25 mètres.
Al pargue i a de flumes longs, amb de gorgs fòrça aimats per las gents del luòc e pels visitants, coma lo riu Arakawa, lo riu Tama, lo Shinano e lo Fuefuki. Tanben dins la prefectura de Saitama cal soslinhar lo canon Nakatsu qu’a una estenduda superiora als 10 km, que crosa lo riu Nakatsu e qu’ofrís plusors païsatges de granda beutat a la tardor, epòca plena de color a la vegetacion.
Un pargue e plusors prefecturas
A la part del Pargue Nacional Chichibu Tama Kai de la prefectura de Yamanashi i a fòrça montanhas, fònt d’inspiracion per fòrça escrivans, en essent lo pic mai naut la montanha de Daibosatu amb 2.057 mètres. Aquela es tanben una de las zònas mai visitadas entre los meses de mai e octòbre, epòca que se pòt gausir la granda beutat dels tapises de flors creadas al FIREWEED, un luòc estonant.
Tanben ailà se pòt visitar lo cròs de Mitake Shosen Gorge, ont i a lo riu Fuefuki, una de las melhoras vias fluvialas de tot Japon, fach amb de ròcas de granit e famós dempuèi lo periòde Edo. L’endrech es lo lairèr de grandas populacions d’aucèls.
Fin finala, e ja dins la prefectura de Yamanashi, i a lo canon Nishisawa, talhat amb lo passatge del temps e del flume Fuefuki, qu’arriba fins a l’estanh Hirose. Del còp que crosa aquel gorg s’i pòdon agachar d’incredibles sauts d’aiga, dont la cascada Nanatsugama Godan. Tanben ailà i a un sens fin de montanhas e bòsques, amb de rotas per passejar e que l’aimant de la natura totjorn ne gausirà.
A la Prefectura de Nagano una dralha crosa la montanha Mokida fins a la montanha Kobushi, un endrech celèbre per los rododendrons que s’i pòdon veire, dempuèi aquela montanha de 2.475 mètres de nautor, e ont comença lo flume Chikuma.
Lo Pargue Nacional de Chichibu Tama doncas ofrís d’armonia entre la natura e las estructuras mai modèrnas bastidas per l’òme, en tot dependre de la sason annadièra, e s’i pòt gausir de desparièrs païsatges, dempuèi lo quite endrech; lo verd primaveral, las colors dels famoses cerièrs en flor a l’estiu, lo ròi de la tardor o lo blanc invernal. Un luòc tanben plen de tradicion, ont s’i pòt visitar mai d’un santuari local, amb de ponts istorics pròches a de lacs naturals tras qu’estonants.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Aqueste article es tanben publicat dins Naturaleza Salvaje, un numeric de geografia e l’environament, que Sapiéncia n’a un acòrdi de cooperacion
