Una expedicion russa al nòrd siberian auriá trapat d’evidéncias que suggerisson que los caçaires-culheires preïstorics serián arribats mai enlà del Cercle Polar Artic. L’espròva seriá l’acamp preïstoric trapat a l’illa de Kotelny e qu’auriá mai de 26 000 ans. Segon aquò, aquel camp seriá lo luòc preïstoric mai septentrional jamai trobat fins ara de l’òme paleolitic. Los caçaires qu’anèron fins ailà caçavan los darrièrs mamots de la planeta.
En aquel acamp los cercaires trobèron de talhaduras sus d’osses de mamot que demòstran que los caçaires-culheires qu’o faguèron èran ailà pr’amor dels mamots. De remembrar que l’illa de Kotelny es una illa luenha situada al nòrd siberian e seriá lo luòc pus septentrional ont foguèt trapada de preséncia umana preïstorica.
Los osses de mamut ailà trapats an una edat de 26 000 ans e foguèron trobats a gaireben 1000 quilomètres al nòrd del Cercle Polar Artic. Gaireben totes los osses de mamot avián de talhaduras umanas. Lo dirigent de l’expedicion, l’arqueològ rus Alexander Kandyba, volguèt soslinhar que la trobalha èra importanta “pr’amor qu’es a la limita de la frontièra septentrionala umana a l’epòca”.
Una frontièra preïstorica nòva
Fins ara los arqueològs sonque avián trapat de rèstas de preséncia umana preïstorica al flume Iana, a la region siberiana d’Iakutia, amb una edat tanben d’aperaquí 27 000 ans. Aqueles quites òmes serián los que puèi se n’anèron fins a l’illa de Kostelny a caçar de mamots, mai de 600 Km mai al nòrd, segon los arqueològs qu’estudièron aquel siti preïstoric.
L’estudi del siti, ara publicat al numeric Live Science demòstra que l’illa de Kotenly èra a l’epòca unida al continent fa 26 000 ans e que lo clima èra fòrça mai suau. A mai, lo nivèl de la mar èra mendre, malgrat que la region èra glaçada la majoritat de l’an. Los cercaires tanplan trobèron de rèstas d’arbres a l’illa, un fach brica comun al luòc pr’amor que i a pas d’arbres ailà pel clima.
A mai dels osses de mamot talhats, los cercaires tanben i trobèron divèrses espleches tanben d’evòri de mamot fachs pels umans. Segon semblariá aqueles caçaires caçavan de mamots mas tanben de cèrvis. E cap trapa foguèt trapada a l’airal. A mai d’aqueles mamifèrs, los caçaires tanben aurián caçat d’autres erbivòrs, cò diguèron los cercaires.
La Redaccion
