Dins un estudi fòrça singular, pr’amor que non es pas estat fach cap d’autre semblable abans, una còla de cercaires an pogut descobrir que l’exposicion a la pollucion de l’aire, quitament corta, pòt aver de conseqüéncias negativas pel cervèl dels umans. Pr’amor que la pollucion del trafec automobil pòt afectar lèu-lèu, en sonque qualques oras, las foncions cerebralas.
L’estudi, realizat amb d’imatges de ressonància magnetica foncionala (RMF), a demostrat qu’una exposicion a la pollucion de l’aire pòt metre fin a la capacitat de diferents airals cerebrals per interagir e comunicar amb d’autres. L’estudi es estat presentat per de cercaires de las universitats de Colómbia Britanica e de Victòria, totas doas en Canadà.
La resulta de l’estudi, publicat dins lo numeric Environmental Health, demòstra cossí sonque una corta exposicion a la pollucion automobila, de doas oras, pòt entraïnar una baissa de las connexions foncionalas del cervèl uman. “Fins ara la sciéncia pensava que lo cervèl èra protegit de la pollucion, çò diguèt Chris Carlsten, cercaire de l’Universitat de Colómbia Britanica. Es lo primièr còp al Mond qu’avèm trapat d’evidéncias del ligam que i pòt aver entre pollucion environamentala e coneissença”.
Per far l’estudi, los cercaires provoquèron l’exposicion de 25 adultes sans a d’aire polluit pendent diferentas oras del jorn; e mesurèron l’activitat cerebrala abans e après l’exposicion amb l’ajuda d’imatges RMF.
Los cercaires analisèron en prigondor los airals mai interconnectats del cervèl, coma las regions restacadas amb la memòria. E aital se demostrèt qu’aquela exposicion demesissiá l’activitat cerebrala. “Una connectivitat foncionala alterada pòt menar a de simptòmas de depression, çò diguèt Jodie Gawryluk, psicològa a l’Universitat de Victòria. Cal far d’autres estudis, mas es solide que la pollucion provòca de problèmas en las personas per pensar o per trabalhar”.
Pasmens, los cambiaments patits pel cervèl aürosament demorèron sonque temporaris. Los cercaires creson que, se l’exposicion es longa, las consequéncias tanben pòdon èsser mai grèvas. Segon los autors de l’estudi, cal avisar totòm del dangièr cerebral que l’entraïna la pollucion del trafec automobil; e o cal poder prevenir.
Un dangièr per totes
“Lo còp venent que sèm dins una veitura al mièg de fòrça trafec, deurem pensar dos còps abans de dobrir la fenèstra, çò apondèt Carlsten. Es melhor d’aver de bons filtres per l’aire e, s’anam en bicicleta o a pè, benlèu çò que cal far es abandonar lèu la carrièra del trafec màger e se n’anar devèrs una autra mai tranquilla”.
En mai d’aquò, los cercaires confirman que la pollucion de l’aire pel trafec automobil es una de las piègers uèi per uèi, mas sospièchan que d’autres tipes de pollucion coma l’exposicion al fum tanben se pòt agreujar. “E nos devèm demandar, çò diguèron, perqué i a mai de problèmas de santat neurocognitius uèi. Los govèrns o deurián poder arrestar lèu, perque es plan dangeirós”.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
