Uèi, mai de 130 milions d’escombres espacials viran a l’entorn de la planeta e poirián lèu menaçar l’avenir de l’espaci pròche de la Tèrra. La menaça seriá plan seriosa car se poirián trucar entre eles e provocar d’explosions que, en mai d’aquò, poirián tanben entraïnar de problèmas tecnics pels satellits artificials e las quitas missions espacialas. D’efièch, fins a uèi, los umans lançèron dins l’espaci mai de 9300 tonas de material espacial e ara sabèm pas cossí manejar tot aquel curum espacial.
Son d’escombres d’ancianas missions espacialas, uèi sens cap de contraròtle uman. Tot comencèt fa mai de 60 ans quand l’Union Soviètica bandiguèt lo primièr satellit dins l’espaci. Dempuèi alara de mai en mai de degalhs especials se tròban a l’entorn de la planeta e los expèrts alèrtan qu’aquò poiriá venir dangierós. Lo problèma es que dempuèi 1957 foguèron mesas en orbita mai de 6050 fusadas que capitèron plan, mai d’11 370 satellits, dont 6900 son encara dins l’espaci, e 4000 encara foncionan plan; e tot aquò fariá mai de 9300 tonas d’escombres espacials que l’òme ne sap pas qué far.
I a un total de mai de 130 milions d’objèctes espacials que pòdon, uèi lo jorn ja, èsser classificats coma de curum espacial, dont 128 milions mesuran mens d’un centimètre de longor. En mai d’aquò, i a fins a 900 000 objèctes espacials tanben considerats coma d’escombraes e que fan mai de 10cm, segon de donadas de l’Agencia Espaciala Europèa.
Tanben, l’UNOOSA, çò es lo bureu de las Nacions Unidas dels afars fòra de la Tèrra, a confirmat tanben que ja i aguèt mai de 500 accidents que rompèron maitas escombralhas espacialas, e avisa qu’aqueles accidents son los pus perilhoses dins l’espaci uèi lo jorn pr’amor que i a de mai en mai de degalhs espacials a l’entorn de la Tèrra. Se romp qualque escombre quand una fusada truca amb el o d’autres objèctes espacials, çò que daissa encara mai de curum espacial, un fach qu’a sovent luòc durant los viatges espacials.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
