LA NASA VÒL BASTIR UN REACTOR NUCLEAR SUS LA LUNA
Segon lo Departament de l’Energia estatsunidenc, cal trobar una font d’energia alternativa que se pòsca emplegar en plusors missions espacialas que se tendràn lèu entre la Tèrra e la Luna. D’efièch, anóncian que la tòca es de bastir un reactor nuclear sus nòstre satellit per tal de donar de sosten energetic a la populacion que i aurà sus las colònias de la Luna a la fin d’aqueste decenni. Puèi, e se tot va plan, ne bastirián tanben un autre sus Mart.
Lo reactor auriá coma font d’energia pròpria l’urani, seriá bastit sus la Tèrra, e puèi enviat sus la Luna. Amb aquel tipe d’energia, la populacion umana sus la Luna poiriá venir totalament independenta energeticament e poiriá plan colonizar la Luna. Aquò seriá lo primièr pas vèrs la colonizacion posteriora de Mart.
Es per aquò que lo govèrn dels Estats Units a ja començat de trabalhar amb lo laboratòri nacional d’Idaho, lo centre de recèrca nucleara pus important d’aquel país. La tòca primièra seriá de poder desvolopar una centrala de fission nucleara que poguèsse èsser operativa sus la Luna lèu.
D’energia per la colonizacion umana
Totes sabèm que la fission nucleara es lo bombardament amb de neutrons d’un nuclèu pesant qu’entraïna sa division en de nuclèus pus pichons, la creacion de neutrons liures e de fotons e una tras que gigantesca quantitat d’energia; d’aquí la tòca de la NASA, pr’amor qu’aquela energia serà de besonh dins las colònias umanas sus la Luna e lo fach de n’aver serà essencial per colonizar amb succès non solament nòstre satellit mas tanben, après, la planeta Mart. Sens energia nucleara, çò dison, i a aurà pas de colonizacion espaciala.
Lo projècte inclutz de poder emplegar l’energia nucleara amb non solament un sistèma de gestion termica que daissariá lo reactor freg, mas tanben un nòu sistèma de distribucion que produiriá almens 40 kw/h d’energia continua. Amb un tipe de reactor coma aquel, los abitants de la Luna aurián d’electricitat pels dètz ans seguents.
A mai, lo reactor se deuriá poder barrar d’un biais automatic. E se l’òm vòl mandar de la Tèrra estant, cal primièr poder bastir una plataforma lunara per lo recebre. Puèi òm lo poiriá menar d’un biais aisit al luòc ont deu èsser bastit per totjorn. Cal pas doblidar que las condicions de las caracteristicas fisicas del reactor seràn fondamentalas; pòt pas èsser gigantesc e doncas solament poiriá mesurar 4 mètres de diamètre e 6 mètres de longor, e pesar pas mai de 6 tonas. De mesuras que, uèi lo jorn, encara semblan d’èsser fantasiosas per un reactor nuclear.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
