LA DISTORSION DE LA MEMÒRIA
Segon la revista scientifica Nature, lo fach de recebre l’informacion a travèrs de las meteissas fonts –Facebook, Instagram o Twitter–, ont mostram nòstra vida privada, pòt provocar una distorsion grèva dins la memòria umana amb de problèmas qu’encara se coneisson pas. Segon aquel article, de recebre de nòvas non realas destrutz la linha que dessepara la memòria individuala e la collectiva.
Aital, l’estudi publicat dins aquela revista confirma que la comunicacion crèa la memòria e qu’un utilizaire pòt refortir la memòria d’un autre en tot repetir los faches: oblidarem los faches non partejats amb los autres. Es çò que se nomena “mecanisme de convergéncia” pr’amor qu’un grop de personas es d’acòrdiper explicar mai o mens un fach d’una determinada manièra.
Lo grand esplech per crear de remembres
Aquò tanben se debana dins los grops socials, e Facebook es, segon aquel article, lo grand esplech per crear de remembres. Un fach seriá pro estonant: la majoritat dels adultes britanics recebon d’informacion solament a travèrs dels malhums socials. Aquò confirmariá que los divèrses grops influisson sus nòstres remembres. Malgrat tot, i a de remembres entre un grop de l’exterior e çò qu’a luòc dins la vida reala –aquò pòt corregir la version del fach mas, de còps, aqueles existisson pas e aquò donariá pas als grops l’escasença de defendre de versions pauc realas.
Tot aquò arriba quand es conegut que las nòvas non realas son de mai en mai perilhosas. Fa gaire, lo president estatsunidenc, Donald Trump, parlèt d’un atemptat que se seriá debanat en Suècia. Puèi, los mejans d’informacion diguèron qu’aquò èra pas vertat. Tròp tard? Dins Internet i a fòrça informacions scientificas non vertadièras e l’Universitat d’Stanford ja confirmèt que la majoritat dels joves d’uèi lo jorn sabon pas desseparar un fach irreal d’un real.
La ment umana de còps s’engana. Qual pòt pas dire que, dins un an, nos remembrarem coma real un fach fals ? Divèrses policitians ja an ensajat d’interpretar la realitat abans, especialament los nazis, pendent los ans 1930: mas après Goebbels divèrses estats occidentals de la planeta o fan de temps en temps. E l’article de Nature avisa que los grops socials pòdon aver tanben una granda influéncia sus nòstra memòria.
La memòria individuala, pauc cha pauc, çò dison los scientifics qu’an fach aquel estudi, serà de mai en mai barrejada amb la memòria collectiva. E se sèm arribats a aquel ponch, lo totalitarisme es pròche. E benlèu alavetz es ja tard.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
