La contaminacion a l’ocean es uèi tan granda que rovilha las ròcas. E l’origina d’aquel fenomèn es sonque umana. Aital o confirman los darrièrs estudis scientifics realizats los darrièrs ans ; la preséncia de plastic a la mar de la planeta tota es ja inquietanta e comença a provocar de cambiaments en l’environament.
Rovilhar vòl dire amassar d’oxid e d’aiga. Ara, e malgrat que los primièrs cases foguèron descobèrts en l’an 2016, foguèt confirmat que lo plastic rovilha las pèiras e ròcas que i a prèp de la mar e que la causa es pas pr’amor d’una oxidacion de las meteissas ròcas. La causa primièra es la preséncia de plastic als oceans.
Uèi ja fa mai de dètz ans que los primièrs cercaires trobèron aquel fenomèn estonant a l’illa de Madèira. Prèp de la còsta i avián de ròcas amb una color plan singulara e diferenta de las autras. Al començament, los scientifics pensèron que lo fenomèn aviá coma causa una coloracion naturala mas, quand las ròcas foguèron analisadas, foguèt descobèrt que i avián de particulas de politilèn (plastic) que demoravan incrustadas a las ròcas ; un fenomèn que i aviá pas abans.
Un fenomèn mondial
« Madèira es pas un cas isolat, çò diguèt la geològa Fernanda Avelar Santos. Après las primièras ròcas trapadas en aquelas illas n’avèm trobat plan mai en d’autres luòcs de la planeta. Lo fenomèn es òrre pr’amor qu’es la contaminacion qu’arriba a provocar de cambiaments al mond de la geologia ».
Fa pas gaire foguèt descobèrt lo meteis fenomèn en divèrsas ròcas de la còsta de Brasil. Se poiriá pensar que solament cal raspar lo plastic de la ròca mas i a de cases qu’aquò es pas possible de far pr’amor que lo plastic demorèt integrat al nivèl molecular de la meteissa ròca.
Lo fenomèn es pas encara estat senhalat coma un fenomèn dangierós per la vida vidanta dels oceans. Totun, es un grèu problèma per l’ecosistèma marin. Pr’amor que demòstra que la destruccion de l’atmosfèra ara tanben arribèt als oceans car l’òme o destruís tot. Lo CO2 provòca de temperaturas pus nautas a la planeta mas lo pastic tanben destrusís la vida que i a la mar.
Uèi lo jorn lo fins a un 85% de degalhs umans son plastic, çò confirmèt lo Ministèri de la Transicion Ecologica francés. Se pensa que i poirián aver entre 75 e 99 milions de tonas de plastic als oceans. De biais annadièr son lençadas mai de 10 milions de tonas de plastic als oceans e aquò comènça a provocar la degradacion de l’environament marin. Tanben de la siá fauna e flòra. E un jorn tot aquò arribarà a nosaltres, los umans.
Lo rovilhat de las pèiras marinas, doncas es estat confirmat coma un nòu fenomèn environamental provocat per d’umans e que provocarà de cambiaments grèus sul meteis en mai d’èsser una grèva menaça per la sieuna fauna e flòra. E los cercaires ja demanan d’avisar tota la populacion mondiala e assajar d’arrestar la creissença de degalhs de plastic a la mar se vòlem contunhar d’aver una vida plena de santat.
La Redaccion
