FOTOSINTÈSI ENTÀ CREAR CARBURANT

Bones notícies arriben per çò que tòque ara produccion de carburants mès ecologics e economics. Ara ua còla scientifica dera Universitat d’Illinois poguec crear carburant liquid damb sonque aigua, diòxid de carbòni e lutz artificiau a trauèrs dera fotosintèsi. Era tòca de poder crear carburants liquids fòrça mès ecologics coma eth propan ei, donc, mès pròplèu pr’amor d’aguesta experimentacion.

Qu’ei causa sabuda qu’es plantes utilizen reaccions quimiques entre era aigua e eth CO2 entà crear energia solara en forma de glucòsa. Ua naua experimentacion hèta per ua còla de quimics americani poguec tanben desvolopar eth madeish procès entà crear carburant liquid. Atau, es scientifics utilizèren era lutz artificiau entà convertir CO2 e aigua en carburant. Entà hè’c utilizèren tanben nanoparticules d’aur coma catalisador.

“Era tòca ère poder produsir idrocarburant liquid damb solament CO2, aigua e lutz, çò confirmèc Prashant Jain, quimic e cap der estudi. Es carburants liquids son ideaus pr’amor que son fòrça mès facils de hèr, mès segurs e mès economics. E ac auem pogut hèr”.

Pendent era experimentacion, un des cercaires, Sungju Yu, poguec utilizar diuèrsi catalisadors metallics entà chucar era nomenada lutz “verda” e transferir es electrons e protons d’aur entara reaccion quimica de CO2 e aigua pr’amor de produsir, fin finau carburant. Ei eth madeish procès utilizat pes plantes entà hèr era coneishuda fotosintèsi”.

Un bon catalisador

Es scientifics utilizèren nanoparticules d’aur, un catalisador que foncione fòrça ben laguens d’aguest procès. Ei atau pr’amor que chuquen pro ben era lutz e non trinquen eth procès coma harien d’auti metaus. Segontes era còla que hèc aquera experimentacion quimica eth nau descorbiment ajudarà era planeta en diuèrsi aspèctes. “Poirie èster utilizat entà produsir electricitat, çò diguèc Jain, pr’amor que ja i a diferenti laboratòris ena planeta que cerquen com hèr era transformacion d’idrocarbòni entà hèr electricitat d’ua manèra eficienta. E ara ja se pòt hèr”.

Eth descorbiment ja siguec qualificat laguens eth mon des scientifics com ua experimentacion excitanta e fòrça utila entara nomenada tecnologia dera energia verda. Ei un procès lèu tant eficient coma es des plantes. Cau, totun, hèr mès recèrca abans de començar era comercializacion a grana escala d’aguesta naua manèra de hèr carburants. Er estudi dera experimentacion siguec publicat en jornau on line Nature Communications.

Era Redaccion

Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita