Uei volem denonciar lo massacre qui vòu har l’estat eslovac sus la soa populacion d’ors bruns. Segon que semblaré, un òmi que passejava al bòsc qu’estó atacat per un ors brun e que’s morí. La responsa deu governament eslovac qu’ei tuar 350 ors e liurar los umans d’aqueth tipe d’atacas.
Atau, lo governament eslovac qu’adoptè ua lei navèra que permet tuar dinc a ua quatau part de la populacion d’ors deu país e tot pr’amor de l’ataca e mort d’ua persona quan passejava al bòc en Eslovàquia centrau. Lo prumèr ministre d’aqueth país, Robert Fico, un politician populista, que confirmè aquera setmana que lo governament autorizarà la caça e mort de dinc a 350 ors au país. La causa oficiau qu’ei lo dangèr qu’aqueth tipe d’animaus pòden provocar aus umans.
“Ne’s pòt pas víver en un país quan i a paur d’anar au bòsc, çò digó lo prumèr ministre Fico. En mai d’aquò, lo governament que declarè l’estat d’emergéncia pr’amor d’aquera ataca, qu’includeish dinc a 55 districtes d’Eslovàquia en un territòri qu’arriba a quasi tot lo país.
Atau, lo governament de Bratislava que demandè dejà proteccion legau entà poder tuar los ors se son tròp prèp deus umans. De soviéner que dejà en 2024, dinc a 93 ors qu’estón caçats e morts en Eslovàquia pr’amor d’aquera causa.
Totun, la tòca de tuar adara dinc a 350 ors mes, que provoquè la condemna totau deus ecologistas d’aqueth país, que considèran qu’aquera decision ei ua violacion de las leis internacionaus sus la proteccion environamentau e que, pr’amor d’aquerò, poiré estar ua lei ilegala. “N’ei pas briga rasonable, çò digó Michal Wiezik, ecològ deu principau partit politic de l’oposicion eslovaca, Eslovàquia Progressista. Qu’ei absurde. Lo ministre de l’environament ne podó pas limitar las atacas dels orses pr’amor qu’ei ua espècia protegida. E adara que vòlen desviar l’atencion dab lo massacre d’aqueths ors”.
Peticion d’intervencion europèa
Wiezik que tanben voló soviéner que i avón milèrs d’encontres enter ors e umans en Eslovàquia l’annada passada e que jamei aquò n’entrainè pas nat incident o accident e que lo son espèr èra adara l’intervencion de l’Union Europea.
L’òmi mòrt per l’ataca d’un ors qu’estó trobat per la policia eslovaca dimèrcs darrèr au bòsc, près del vilatge de Detva, en Eslovàquia centrau. Segon que semblaré, l’òmi qu’estó aucit per un ors brun lo dimenge a la nueit precedent. L’òmi, de 60 ans, qu’estó considerat desaparegut lo dissabte precedent aprés non pas poder tornar dab la soa familha en tot har ua visita au bòsc de la region.
Segon la policia, l’òmi que’s morí pr’amor de l’ataca d’un ors que li provoquè de nafras plan grèvas au cap. Los policièrs que tanben trobèn lo lòc on dromiva l’ors près d’acerà. Aquò, que provoquè lèu l’alarma sociau a la region, pr’amor qu’i a de mei en mei encontres enter ors e umans au páis.
De soslinhar qu’ei pas lo prumèr còp qu’un uman ei atacat per un ors en Eslovàquia. En 2024 ua bielorussa joena de 31 ans que tombè dens un precipici au nòrd deu país e puish estó atacada e morta per un ors. Solament qualcunas setmanas après, un video que demostrava qu’un ors passejava plan pendent lo dia a la vila de Liptovsky Mikolas en tot provocant lo caos sociau deu vilatge.
Lo governament que confirmè que l’ors estó puish fusilhat maugrat que los ecologistas digón que l’animau caçat èra un aute e pas lo qui avèva entrat au vilatge. Alavetz, lo ministre d’Eslovàquia, Tomas Taraba, que digó la setmana darrèra qu’en Eslovàquia dejà i avèvan mei de 1.300 orses bruns e que n’i auré pro dejà dab solament 800, pr’amor que la populacion d’ors bruns contunhava de créisher.
Totun, divèrs expèrts qu’afirmèn que la populacion d’ors deu país podèva estar situada a l’entorn de 1.270 especimèns e qu’aquera populacion èra establa. En efèit l’ors brun pòt estar plan trobat a las montanhas d’aqueth territòri, los Carpats e a totas las montanhas que i a enter Romania e Ucraïna e en Polonha e Eslovàquia.
La Redaccion
Fotografia principau: Luke Jones/CC.
Aquesta cronica suu Ràdio País :
