Cossí podèm respondre davant d’una crisi economica? Existisson doas teorias opausadas. L’economista John Maynard Keynes defendiá la maximala intervencion de las Administracions Publicas en lo sistèma economic. Son las teorias keynesianas. La siuena opinion foguèt fòrça escotada pendent la Granda Depression dels ans 1930.
Keynes opinava que se l’Estat creava d’entrepresas e de luòcs de trabalh, aquela situacion provocariá que fòrça familhas dispausèsson d’entradas per poder consomar e aumentariá la demanda. Las entrepresas aurián de besonh contractar mai de trabalhadors per satisfar aquela creissenta demanda e las taxas de caumatge se redusirián. Se l’empresa privada aviá de besonh mai de trabalhadors, aqueles sortirián de las entrepresas publicas, e l’Estat poiriá començar a redusir la siuena preséncia dins de l’economia.
Una politica dangierosa
Mas manténer aquela politica d’intervencion publica a l’economia significava augmentar los impòstes considerablament. Keynes utilizava una metafòra qu’explicava que “seriá fòrça productiu que l’Estat contractèsse de trabalhadors solament per voidar e emplir de traucs, mas aurián d’un sòu per consomar”. Pendent la presidéncia de Franklin Delano Roosevelt als ans 1930, foguèt aplicada una politica similara amb lo New Deal, per superar la Depression d’aquel decènni.
Amb un posicionament radicalament opausat, lo liberalisme defend que la melhora formula per superar una crisi economica es redusir los impòstes. Amb aquela situacion, las familhas e las entrepresas dispausarián d’un capital superior per poder consomar o investir, qu’aumentariá la demanda a las entrepresas.
Aquela superiora demanda auriá de besonh mai de trabalhadors e redusiriá tanben la taxa de caumatge, s’aumentarián los beneficis de las entrepresas e l’economia sortiriá de la crisi economica. Aquela politica economica liberala foguèt aplicada als Estats Units d’America pendent las presidéncias de Ronald Reagan e George Bush als ans 1980, e tanben pendent aquel decènni a la Grand Bretanha de Margaret Thatcher. Quina politica economica cresètz mai adequada ?
Un article de Francesc Sangar*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
