La descobèrta arqueologica d’una vila romana a la còsta de Tanzania, dins l’Africa mai prigonda, es una noticia tras qu’estonanta. Segon los arqueològs tanzanians que la trapèron, seriá la vila romana perduda de Rhapta, situada fa mai de 2000 ans prèp de l’illa de Mafia, a la còsta tanzaniana. Çò que ne demòra foguèt classat coma una vila romana apuèi ne descobrir divèrsas rèstas enfonzadas a l’ocean.
Per ansin, Feliz Chami, cap d’una còla d’arqueològs de l’Universitat de Dar es Salaam, confirmèt que los murs e bastidas trobats jos l’aiga a l’illa de Mafia apertenon a la vila romana de Rhapta, lo darrièr e mai luenhan luòc d’escambi comercial dels romans amb d’indigènas africans a l’epòca. Segon aqueles arqueològs la tecnica per bastir la vila, la ceramica e lo luòc son parièrs a de descripcions anticas romanas de la vila de Rhapta.
Rhapta foguèt pendent de sègles una vila perduda romana en Africa pr’amor que se coneissiá pas exactament ont foguèt bastida. La vila aguèt una edat d’aur pendent lo sègle I e al libre Viatge per la Mar d’Eritrèa (escrich d’aperaquí l’an 50 apuèi lo Crist) ja se ne parlava.
Segon aquela descripcion Rhapta foguèt la vila romana pus meridionala de comèrci d’Azania, una region que los romans utilizèron per desseparar l’Africa Negra de Barbaria o l’Africa Mediterranèa. Fins uèi lo jorn divèrses luòcs èran estat prepausats. Divèrses istorians e arqueològs disián qu’èra situada a Msasani, d’autres a Kisuyu e d’autres encara a l’illa de Mafia. Fins la descobèrta d’aqueles murs a l’ocean que i a prèp de l’illa de Mafia en 2016.
A la recèrca d’un fòrt portugués
La tròba de la vila romana de Rhapta se passèt quora lo cercaire Alan Sutton cercava un ancian fòrt portugués que poiriá se trobar al luòc fa divèrses sègles. En luòc d’aquò trobèt de murs d’una vila al long de quatre quilomètres, que semblavan èsser las muralhas de Rhapta. En mai d’aquò, Sutton trapèt de pèiras de 5 mètres de longor que serián estadas fachas amb de ciment. E qu’èran situadas al nòrd a al sud de la vila (solament los romans produsiguèron de ciment a l’epòca antica).
Pauc apuèi Sutton mostrèt de fotòs a l’arqueològ Chami, segon confirmèt lo jornal International Bussiness Times de Tanzania. E Chami decidiguèt de visitar el atanben lo luòc. Alavetz trapèt que los murs e divèrsas bastidas èran encara en plan bona situacion e que los murs fasián tre 5 e 6 mètres de nautor. A mai, la ceramica tanben semblava èsser d’origina romana.
“Semblariá que podèm parlar de Rhapta. Es pas cap fòrt alemand, britanic o portugués, çò diguèt Chami. I a pas res restacat amb la cultura swahili. Sonque pòt èsser la vila romana de Rhapta. Los romans disián que Rhapta èra situada en la fin del delta d’un riu que los naviris podián i navigar. E lo solet flume que pòt èsser navigat a la còsta d’Africa de l’Èst es ont i a la baia de Mafia”.
La Redaccion
